Qazaqstandyq júrgizýshiler eki jolaqty jolda birtutas syzyqty kesip ótkeni úshin kýáliginen aiyrylady. Ishki ister ministrligi jol qozǵalysynyń jańa erejeleri týraly buiryq jariialady, dep habarlaidy Dalanews.kz.
“Eldi mekenderdegi avtobýstardyń jyldamdyǵy endi saǵatyna 50 shaqyrymǵa deiin tómendeidi. Eger buryn kólik quralyna sáikestendirý belgisin birinshi jáne ekinshi toptaǵy múgedekter qoia alatyn bolsa, endi mundai belgini tirek-qimyl apparaty buzylǵan úshinshi toptaǵy múgedekter de paidalana alady”, – dedi IIM ákimshilik politsiia komitetiniń erekshe tapsyrmalar boiynsha aǵa inspektory Aqtoty Boranova.
Sondai-aq baǵdarshamda jasyl pliýs belgisi paida bolady, ol qarsy qozǵalys úshin tyiym salatyn tústiń qosýly ekenin kórsetedi. Buryn bul qyzyl pliýs boldy.
Júieni aýystyrýǵa aqsha bólinbeidi, olardy qaita baǵdarlamalaý jetkilikti. Biraq júrgizýshilerdiń úirenip ketýi úshin ýaqyt qajet. Sondyqtan sarapshylar jańa erejeni buzǵandardy qatań jazalamaýǵa shaqyrdy.
Sońǵy kezderi samokatpen jol erejesin buzatyndar kóbeigen. Ótken jazda olarǵa velosiped joldarynda júrýge ruqsat etildi, al trotýarlarda júrgende jyldamdyǵy saǵatyna 6 shaqyrymnan aspaýy kerek.
“Biyl Almaty qalasynda samokattyń qatysýymen 22 jol-kólik oqiǵasy tirkelip, 24 adam zardap shekti. Ótken jyldyń sáikes kezeńimen salystyrǵanda jol-kólik oqiǵalarynyń óskeni baiqalady”, – dep málimdedi Almaty qalalyq politsiia departamenti jergilikti politsiia qyzmetiniń aǵa inspektory Aian Baqytov.
Sońǵy bir jylda elimizde moped júrgizýshileriniń qatysýymen 750 jol-kólik oqiǵasy tirkeldi. Bul 2022 jylmen salystyrǵanda tórt ese kóp. Qazirdiń ózinde zań jobasy bar, oǵan sáikes moped júrgizýshilerine memlekettik nómirler berilip, kólik júrgizýshileri siiaqty aiyppul salynady.
Eki apta buryn túzetýler birinshi oqylymda maquldandy, biraq zań áli kúshine engen joq.
