قازاقستاندىق جۇرگىزۋشىلەر ەكى جولاقتى جولدا ءبىرتۇتاس سىزىقتى كەسىپ وتكەنى ءۇشىن كۋالىگىنەن ايىرىلادى. ىشكى ىستەر مينيسترلىگى جول قوزعالىسىنىڭ جاڭا ەرەجەلەرى تۋرالى بۇيرىق جاريالادى، دەپ حابارلايدى Dalanews.kz.

“ەلدى مەكەندەردەگى اۆتوبۋستاردىڭ جىلدامدىعى ەندى ساعاتىنا 50 شاقىرىمعا دەيىن تومەندەيدى. ەگەر بۇرىن كولىك قۇرالىنا سايكەستەندىرۋ بەلگىسىن ءبىرىنشى جانە ەكىنشى توپتاعى مۇگەدەكتەر قويا الاتىن بولسا، ەندى مۇنداي بەلگىنى تىرەك-قيمىل اپپاراتى بۇزىلعان ءۇشىنشى توپتاعى مۇگەدەكتەر دە پايدالانا الادى”، – دەدى ءىىم اكىمشىلىك پوليسيا كوميتەتىنىڭ ەرەكشە تاپسىرمالار بويىنشا اعا ينسپەكتورى اقتوتى بورانوۆا.

سونداي-اق باعدارشامدا جاسىل پليۋس بەلگىسى پايدا بولادى، ول قارسى قوزعالىس ءۇشىن تىيىم سالاتىن ءتۇستىڭ قوسۋلى ەكەنىن كورسەتەدى. بۇرىن بۇل قىزىل پليۋس بولدى.

جۇيەنى اۋىستىرۋعا اقشا بولىنبەيدى، ولاردى قايتا باعدارلامالاۋ جەتكىلىكتى. ءبىراق جۇرگىزۋشىلەردىڭ ۇيرەنىپ كەتۋى ءۇشىن ۋاقىت قاجەت. سوندىقتان ساراپشىلار جاڭا ەرەجەنى بۇزعانداردى قاتاڭ جازالاماۋعا شاقىردى.

سوڭعى كەزدەرى ساموكاتپەن جول ەرەجەسىن بۇزاتىندار كوبەيگەن. وتكەن جازدا ولارعا ۆەلوسيپەد جولدارىندا جۇرۋگە رۇقسات ەتىلدى، ال تروتۋارلاردا جۇرگەندە جىلدامدىعى ساعاتىنا 6 شاقىرىمنان اسپاۋى كەرەك. 

“بيىل الماتى قالاسىندا ساموكاتتىڭ قاتىسۋىمەن 22 جول-كولىك وقيعاسى تىركەلىپ، 24 ادام زارداپ شەكتى. وتكەن جىلدىڭ سايكەس كەزەڭىمەن سالىستىرعاندا جول-كولىك وقيعالارىنىڭ وسكەنى بايقالادى”، – دەپ مالىمدەدى الماتى قالالىق پوليسيا دەپارتامەنتى جەرگىلىكتى پوليسيا قىزمەتىنىڭ اعا ينسپەكتورى ايان باقىتوۆ.

سوڭعى ءبىر جىلدا ەلىمىزدە موپەد جۇرگىزۋشىلەرىنىڭ قاتىسۋىمەن 750 جول-كولىك وقيعاسى تىركەلدى. بۇل 2022 جىلمەن سالىستىرعاندا ءتورت ەسە كوپ. ءقازىردىڭ وزىندە زاڭ جوباسى بار، وعان سايكەس موپەد جۇرگىزۋشىلەرىنە مەملەكەتتىك نومىرلەر بەرىلىپ، كولىك جۇرگىزۋشىلەرى سياقتى ايىپپۇل سالىنادى.

ەكى اپتا بۇرىن تۇزەتۋلەر ءبىرىنشى وقىلىمدا ماقۇلداندى، ءبىراق زاڭ ءالى كۇشىنە ەنگەن جوق.