Birikken Arab Ámirlikterinde qaza bolǵan apaly-sińlili Aqjan men Juldyz Bohanovanyń denesi Qazaqstanǵa jetkizilip, jer qoinyna tapsyryldy. Qyzdardyń ákesi Meiram Bohanov olardyń óliminiń naqty sebebi áli belgisiz ekenin aitty, dep habarlaidy dalanews.kz.
KTK telearnasynyń málimetinshe, BAÁ politsiiasy marqumdardyń denesin ákesine DNQ saraptamasy arqyly týystyǵy rastalǵannan keiin ǵana bergen. Meiram Bohanov qyzdarynyń júzin Qazaqstanǵa jetkizilgen soń, jerleý rásimi aldynda kórgenin jetkizdi.
"Júzderin tek meshitte ashtym. Baýyrym ekeýmiz kórdik, bizdiń qyzdarymyz eken... Analary olardy kórgen joq. Qyzdaryn qýanyshty ári baqytty qalpynda esinde saqtasyn", – dedi ol.
Apaly-sińlili ótken jyldyń jeltoqsanynda Shardjaǵa jumys isteýge ketken. Ata-anasynyń aitýynsha, olar jergilikti sulýlyq salonynda eńbek etken. Keiin qyzdardyń denesi jaldamaly páterden tabylǵan. Biri 20, ekinshisi 22 jasta bolǵan.
Marqumdardyń ákesi áleýmettik jelide tarap jatqan túrli nusqalarǵa senbeýge shaqyrdy. Onyń aitýynsha, ázirge resmi saraptama qorytyndysy shyqpaǵan.
"Júrekteri toqtaǵan" dep aityp jatyr. Olardyń naqty qalai kóz jumǵanyn, qalai óltirilgenin bilmeimiz. Internette taraǵan aqparattyń bári – jalǵan. Oǵan senbeńizder! Saraptamanyń resmi qorytyndysy shyqqannan keiin ǵana naqty málimet aita alamyz", – dedi Meiram Bohanov.
Materialda is boiynsha kúdikti ustalǵany da aitylady. Qyzdardyń ákesiniń sózinshe, ustalǵan adam Qazaqstan týmasy. Alaida onyń kinási men oqiǵadaǵy róline qatysty túpkilikti qorytyndyny tergeý anyqtaidy.
