Birikken Arab Ámirlikteriniń Shardja qalasynda eki qazaqstandyq boijetken qaza tapty. Bul aqparatty Qazaqstannyń Syrtqy ister ministrligi rastady, dep habarlaidy dalanews.kz.
SIM málimetinshe, qazirgi ýaqytta BAÁ-niń quzyrly organdary oqiǵanyń mán-jaiyn anyqtap jatyr. Tergeý júrip jatqandyqtan, ázirge qosymsha aqparat jariialanbaidy.
Qazaqstannyń Dýbaidaǵy Bas konsýldyǵy marqumdardyń otbasylarymen bailanysta. Diplomattar qujattardy rásimdeý jáne jergilikti organdarmen ózara is-qimyl jasaý máseleleri boiynsha qajetti kómek kórsetip jatyr.
«Qazaqstannyń Syrtqy ister ministrligi BAÁ-niń Shardja qalasynda qaza tapqan azamattarymyz A. B. jáne J. B-nyń týǵan-týystary men jaqyndaryna shyn júrekten kóńil aitady. SIM qaza tapqandardyń otbasylarymen bailanysta jáne óz quzyreti sheńberinde olarǵa qajetti kómek kórsetip jatyr», – delingen vedomstvo habarlamasynda.
Týystarynyń aitýynsha, 2004 jáne 2006 jyly týǵan qyzdar Shardjada jumys istegen. Olar tamyzdyń sońy nemese qyrkúiektiń basynda Qazaqstanǵa oralýdy josparlaǵan.
Alaida shamamen bir apta buryn boijetkender jaqyndarymen bailanysqa shyqpai qalǵan. Keiin týystary olardyń deneleri tabylǵanyn habarlaǵan.
Otbasy ókilderiniń sózinshe, qyzdar pyshaq jaraqatynan kóz jumǵan, al oqiǵaǵa qatysy bolýy múmkin kúdikti ustalǵan. Sondai-aq kúdiktiniń Qazaqstan azamaty bolýy múmkin ekeni aityldy.
Degenmen qyzdardyń naqty neden qaza bolǵany, kúdiktiniń ustalǵany jáne onyń azamattyǵyna qatysty bul málimetterdi resmi organdar ázirge rastaǵan joq.
Marqumdardyń jaqyndary áleýmettik jeli arqyly olardyń denesin Qazaqstanǵa jetkizýge kómek suraǵan.
