Jıynda sóz alǵan qala ákimi Memleket basshysynyń ekonomıkany ártaraptandyrý, ımportqa táýeldilikti barynsha azaıtý, qoǵamdyq ál-aýqatty arttyrý sekildi máselelerdi sheshý boıynsha bergen tapsyrmalaryn tyńǵylyqty oryndaý qajettigin aıtty.
– Ótken jyly barlyq nysanaly ındıkatorlarǵa qol jetkizip, qalamyzdyń áleýmettik-ekonomıkalyq damýynda oń dınamıka baıqaldy. Bul jylǵy meje odan da joǵary. El damýyndaǵy oń ózgerister bıznespen tikeleı baılanysty bolǵandyqtan saıası reformalardy birlese júzege asyrý kerekpiz. Memleket kásipkerlikti damytý úshin qolaıly orta qalyptastyryp, kásipkerler qoǵamǵa, halyqqa qyzmet etse, bul óz kezeginde eldiń ál-aýqatyn arttyrýǵa, turmys deńgeıin kóterýge yqpal etetindigi sózsiz. Osyǵan oraı qalamyzdyń bıznes ókilderin jańa jobalardy birlese júzege asyrýǵa shaqyramyn. Ákimdik tarapynan barlyq qoldaý sharalary bolady, – dedi M.Áıtenov.
Qańtardaǵy jappaı tártipsizdik nátıjesinde 33 kásipkerlik sýbektisi túrli deńgeıde zardap shegip, 238,8 mln teńge shyǵynǵa ushyraǵanyn, 19 bıznes nysanynyń qyzmeti qalpyna keltirilip, qalypty rejımde jumys istep jatqanyn aıtty. Zardap shekkenderdiń kásipteri tolyq qalpyna keltiriletinin jetkizdi.
Shymkentte koronavırýstyq pandemıaǵa «Qarapaıym zattar ekonomıkasy» baǵdarlamasy sátti júzege asyrylýda. Baǵdarlama sheńberinde búgingi kúni 64 mlrd.teńgege 77 jobany qarjylandyrý maquldanǵan. «Bıznestiń jol kartasy» baǵdarlamasynda salalyq shekteýlerdiń alynyp tastalýyna baılanysty shaǵyn kásip arasynda joǵary suranysqa ıe bolyp, 2021 jyly 50,9 mlrd.teńge somasyna 1523 SHOB-pen shartqa qol qoıylǵan. Bul rette ınvestısıalyq shtab jumysynyń tıimdiligin atap ótýge bolady. Ashyq alań bıznes máselelerin jedel sheshýge kómektesip, ınvestısıa tartýdyń quralyna aınaldy.
Kezdesýde kásipkerler bıznestiń damýyna kedergi keltiretin ózekti máselelerdi aıtyp, atqarýshy bılik ókilderimen sheshý joldary usynyldy.
