Aisultan Nazarbaev igi isinen jarnama izdemeýdi ótindi
"Astana ákimdiginen jaqsy jańalyq: Taldykóldiń máselesin osy jyldyń qyrkúiek aiyna deiin túptamyrymen joiýǵa ýáde berildi. Bul Astanany turǵyndarǵa yńǵaily etýde aitarlyqtai qadam bolmaq. Bári oidaǵydai bolady dep úmittenemin", – dep jazdy ol.
– Bul týraly ne úshin jazba qaldyrýdy sheshtim? Birinshiden, men bul qalany shyn súiemin, ekinshiden, men qashan da ádilettiliktiń jaǵyndamyn. Sózim oryndy bolǵanda, ákimdiktiń kemshilikterin búkpei aittym. Al búginde olar maqtaýǵa laiyq bolǵandyqtan, maqtaý aitýdy jón sanadym, – deidi Aisultan.
Ol osy joly da tek sózdermen shektelmeitinin alǵa tartty.
"Olardyń qatelikterine ispen jaýap qaitarýǵa ázir ekenimdi aitqan kezdegidei, osy joly da tek sózben shektelip qalmaimyn. Eger olar sózinde tursa, alǵys retinde qalaǵa yńǵaily jerde aǵashtar alleiasyn otyrǵyzýǵa ýáde beremin. Ákimdikke tek oryndy tańdap, kórsetse bolǵany. Árine mamandardy tartamyn, degenmen ózim de belsendi qatysyp, qala turǵyndaryn senbilikke shaqyratyn bolamyn", – dep sendirdi Aisultan.
Aisultan bul qadamynan piardy izdeýdiń qajeti joqtyǵyn aitty.
– Bul tusta piar izdep álek bolmańyzdar – ondai nietim joq. Maǵan eshqandai estelik taqtalardyń keregi joq. Qala onyń turǵyndaryna tiesili. Bul bizdiń keremet úiimiz jáne ony jaqsartýǵa árkim múddeli, – dep oiyn túidi ol.
Aita ketsek, Taldykóldegi jaǵymsyz iis máselesi búginde ózekti bolyp otyr. Prezident Astana ákimin Taldykóldiń iisi joiylmaityn bolsa, sol jerde kiizúige turǵyzýǵa ýáde etken bolatyn.
