Quttyqtaýyn Feisbýktaǵy paraqshasynda jariialaǵan Aisultan, eń aldymen qyzdy bolǵan kezde tilekterin jaýdyrǵan tileýlesterge alǵys bildirip, qyzynyń esimin kim dep qoiǵanyn da aitty dep habarlaidy stan.kz.
“Dostar men sizderge alǵys aitqym keledi. Biz sizderden eshteńe jasyrmaimyz. Sol sebepti qyzymyzdyń esimin qalai qoiǵanymyzdy da aitqym keledi. Bizdiń sulýymyzdyń aty Ameli Nazarbaeva. Bizdiń kishkentai otbasymyzǵa tilegen tilekterińiz úshin rahmet aitamyz”
– dep jazdy.
Osylaisha rizashylyǵyn jetkizgennen keiin, kúnniń negizgi taqyryby Elbasynyń týǵan kúnine qatysty júrekjardy quttyqtaýyn jetkizgen.
“Búgin biz úshin erekshe kún – Qazaqstan prezidenti Nursultan Nazarbaevtyń týǵan kúni. Ol kisiniń keremet isteri meniń árkez júregimde. Bir jaǵynan árine, men ol kisiniń nemeresimin. Taǵy bir nárse – men osy Qazaqstannyń azamatymyn. Men – qazaqpyn. Álemniń kez-kelgen elinde ózimniń ultym týraly maqtanyshpen aita alamyn. Myńdaǵan jylǵa sozylatyn tarihymmen maqtanamyn. Biz keshegi kóshpeli halyqtardyń urpaǵymyz. 550 jyl buryn óz aldaryna bólek el bolǵan babalarymyz bizge beibit kúndi syilady”, – degen Aisultan Nazarbaev 25 jyl buryn táýelsizdik alǵan qazaq eliniń eńsesin tiktep, etegin jinap el qylýda, shekarasyn tolyqtai bekitip shyǵýda prezidenttiń eńbegi orasan ekenin aitqan.
“Sonaý Kerei men Jánibekten bastap barlyq babalarymyz halyqtyń birligi men uiymshyldyǵyn saqtai aldy. Abylai han aitqan: Mende úsh arman boldy. Birinshisi: óz elimdi beibit ómirge jetkizý, biraq ol úshin kóp qan tógildi. Ekinshisi: men halqym úshin qala turǵyza almadym. Úshinshisi: búkil halyqty sońyna deiin biriktire almadym”.
Abylai hannyń armany búgingi Qazaqstanda oryndaldy.
Ony eshqandai han oryndai almady, biraq alǵashqy zańdy sailanǵan prezident oryndady. Bizdiń erjúrek, qaisar halqymyz prezidentpen birge 25 jyl ishinde ǵasyrǵa bergisiz jumys atqara aldy. Bul bizdiń uly, kez-kelgen igi iske ikemdi halyq ekenimizdi anyq ańǵartady. Allaǵa shúkir, qazaqta osyndai kóshbasshy bar. Abylai hannyń ózi qazirgi zamandy kórse prezidentpen maqtanar edi”, – deidi ol.
Nemeresi sóz sońynda “Ata Sizdi týǵan kúnińizben quttyqtaimyn! Sizge zor densaýlyq tileimin. Alla-Taǵala Sizge eń uzaq ómir bersin!”, – dep aiaqtaidy.
