Depýtat Ashat Aimaǵambetov Býrabaida ótken Ulttyq quryltaidyń IV otyrysynda kóterilgen máselelerge keńinen toqtalyp, bul rette QR Parlamenti Májilisinde qandai zań jobalary qarastyrylyp jatqanyn aitty, dep habarlaidy Dalanews.kz.
"Prezident Ulttyq Quryltaida eldiń bolashaǵy, damýy jáne Qazaqstan myqty bola túsýi úshin dál qazir qandai qadamdar jasaý kerektigi týraly oilarymen bólisti. Eń bastysy – alǵa jyljý. Ekonomika, adami kapital, tehnologiialar, mine osylardyń barlyǵyn damytý kerek" degen depýtat Facebook-tegi jazbasynda keibir salalarǵa jekelei toqtalady.
BILIM BERÝ JÁNE ǴYLYM
Mektepterdi salý jetkiliksiz, olardy zamanaýi, qoljetimdi ári yńǵaily etý kerek. Bul – qalada da, shalǵai aýylda da, shekaralas óńirlerde de turatyn ár balanyń igiligi úshin jasalatyn sharýa. Stýdentter men jas ǵalymdardy, tehnologiialardy qoldaý – jai shyǵyn emes, bolashaqqa quiylǵan investitsiia. Qazir depýtattar "ǵylymi qalashyqtar" jónindegi zań jobasymen ainalysyp jatyr. Bul – ǵylymdy belsendi damytýdaǵy mańyzdy betburys bolmaq.
DENSAÝLYQ SAQTAÝ JÁNE ÁLEÝMETTIK QORǴAÝ SALASY
Aýrýhanalar men ońaltý ortalyqtary halyqqa jaqyn ornalasýy tiis. Emdelý úshin adamdar júzdegen shaqyrymdy eńsermeýi kerek. Prezident osyndai olqylyqtardy joiý baǵytynda úlken jumystar qolǵa alynǵanyn atap ótti.
Memleket basshysy erekshe qajettiligi bar balalar men inkliýzivti oqytý máselesine de nazar aýdaryp, arnaiy zań ázirleýdi tapsyrdy. Bul – jái ǵana kómek emes, bul árbir balanyń laiyqty bilim alyp, qoǵamǵa beiimdelýine, tolyqqandy ómir súrýine jol ashatyn bastama. Otbasylardy, áielder men balalardy qoldaý, ómirdiń qiyn jaǵdaiyna tap bolǵan adamdarǵa kómektesý – jái aitylǵan bos sóz emes, naqty sheshilýi kerek mindetter.
MÁDENIET JÁNE ULTTYQ BEINE
Ulttyq mádeniet – halyqtyń jany men rýhani qazynasy. Filmder, teatrlar men kitaptar – tek óner týyndylary emes, ulttyń bolmysyn tanytatyn qundylyqtar. Kinoindýstriiany damytý týraly zańnamalyq ózgerister ázirlenip jatqany da osyǵan dálel. Bul jerde tek qarajat bólý emes, mazmun men sapanyń joǵary bolýyn qamtamasyz etý mańyzdy.
Sondai-aq, jeke bilim berý uiymdaryna qatysty ataýlardy retteý máselesi talqylanýda. Zań jobasy birinshi oqylymnan ótti.
Teatrlar men olardyń infraqurylymyn qoldaý – mańyzdy mindet. Múmkin, biznes pen demeýshilerdi tartyp, zańnamalyq turǵydan júieli qoldaý mehanizmin jasaý qajet bolar.
SPORT JÁNE ÓŃIRLERDI DAMYTÝ
Balalarǵa oiyn alańdary, jastarǵa laiyqty sport ortalyqtary kerek. Chempion bolý – árkimniń armany, alaida eń bastysy – halyqtyń densaýlyǵyn nyǵaitý. Óńirler sóz júzinde emes, is júzinde qaryshtaýy tiis. Adamdar óz óziniń týǵan qalasynda, aýylynda tańdaý bolmaǵandyqtan emes, qolaily jaǵdailarǵa jasaýǵa múmkindikter bolǵandyqtan ómir súrýi kerek.
BUDAN ÁRI NE BOLMAQ?
Prezident – naqty áreketterge bet burý qajettigin atap ótti. Tarihi muramyzdy qadirlei otyryp, ótkenge bailanyp qalmai, bolashaqqa qarai umtylýymyz qajet.
Búginde depýtattar erekshe balalardy qoldaý, "ǵylymi qalashyqtardy" qurý, kinoindýstriia, bilim berý mekemeleriniń ataýlaryn retteý, densaýlyq saqtaý men mádeniet salasyn damytýǵa qatysty zańdar men túzetýlerdi daiarlap jatyr. Teatrlardy qoldaý men olardyń infraqurylymyn jetildirý úshin qosymsha sharalar qolǵa alynýy da yqtimal.
Alda úlken jumys kútip tur.
