Belgili advokat Johar Ótebekov marqum Sherzat Bolat isine qatysty pikir bildirdi. Onyń aitýynsha, oqiǵa ornynda 15 adam bolǵanymen, tek bir adam kisi óltirdi dep aiyptalyp otyr, dep habarlaidy Dalanews.kz.
Advokattyń málimetinshe, tergeý barysynda 13 adam kúdikke ilinip, 11-i qamaýǵa alynǵan. Alaida sotqa tek 9 adam jetkizilip, olardyń ishinde kisi óltirý boiynsha naqty aiyp tek bir adamǵa taǵylǵan. Qalǵandaryna “buzaqylyq” baby boiynsha is qozǵalǵan.
“Biz bárimiz video kórdik. Eger bul toptyq kisi óltirý bolmasa, onda ne? Politsiia men prokýratýra nege “Hýtordyń” jigitterin kinásiz dep esepteidi?” — dep jazdy Johar Ótebekov áleýmettik jelidegi paraqshasynda.
Advokattyń aitýynsha, sýdia sot protsesin zań aiasynda júrgizip jatyr, biraq aiyptalýshylardyń kópshiligin bastapqyda bosatyp jibergen tergeýshiler men prokýrorlar sottyń qolyn bailap otyr.
“Bálkim, bir jyldan keiin bul “buzaqylar” shartty túrde merziminen buryn bosap shyǵyp, taǵy da bireýlerdiń “uiqysyn buzýy” múmkin”, — dep qosty Ótebekov.
Ol sondai-aq kúdiktilerdiń ýaqytsha ustaý izoliatorynda toilaǵany týraly derekterge jáne olardyń sot zalyndaǵy kúlkisine nazar aýdartyp, bul jaittar zań men ádilettiń tolyq saltanat qurmaǵanyn kórsetetinin aitty.
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵanan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
