Qazaqstandyq dıplomat Sáken Mamash sottyń sheshimine qarsy shyǵýǵa tyrysty, dep habarlaıdy Dalanews.kz.

Sáken Mamash apelásıalyq aryzdy 3 shildede jazǵan. Aryz sol kúni-aq qaralǵan. Dıplomattyń qorǵaýshylary onyń kinási dáleldenbegenin aıtady. Olar bul jaıt Abý-dabıde bolǵanyn, sondyqtan Qazaqstannyń quzyretine jatpaıtynyn aıtqan. 

Alaıda sot apelásıalyq aryzdy qanaǵattandyrmady. 

"Apelásıalyq saty sot aktisine ózgerister engizý ne onyń kúshin joıý úshin quqyqtyq negiz taba almady. Ákimshilik quqyq buzýshylyq jónindegi mamandandyrylǵan aýdanaralyq sottyń sheshimin ózgerissiz, apelásıalyq shaǵymdardy qanaǵattandyrmaı qaldyrýǵa qaýly etemiz", delingen habarlamada.

Aıta keteıik, 28 maýsymda sot Sáken Mamashty áıeli men onyń ápkesin urǵany úshin 15 táýlikke qamaýǵa alǵan bolatyn. 

Dıplomattyń áıeli Karına Mamash 5 mamyrda onyń kúıeýi ápkesi ekeýin uryp tastaǵanyn aıtqan bolatyn. Artynsha Qazaqstannyń Syrtqy ister mınıstrligi dıplomatty elge ákeldi. 

9 mamyrda Karına Mamash Qazaqstanǵa oralyp, balalarymen daǵdarys ortalyǵyna ornalasqan. Al áıelin birneshe jyl boıy azaptady degen Sáken Mamash jeti jylǵa deıin bas bostandyǵynan aıyrylýy múmkin.