Komısıa tóraıymy, Prezıdent Ákimshiligi Basshysynyń orynbasary Aıda Balaeva otyrysty ashyq dep jarıalap, Komısıa jumysynyń negizgi basymdyǵy – adamgershilik-otbasylyq qundylyqtardy nyǵaıtý, balalardyń quqyqtary men zańdy múddelerin qorǵaý, áıelderdiń quqyqtary men múmkindikterin keńeıtý jónindegi mindetter ekenin aıtty.
– Qujat memlekettik otbasy, demografıalyq jáne genderlik saıasat salasyndaǵy ózekti mindetterdi aıshyqtaýǵa baǵyttalǵan bastamalar toptamasyn qarastyrady. Olardyń qatarynda, ana men bala ólimin azaıtý, jasóspirimder arasyndaǵy álimjettilik pen sýısıdtiń aldyn alý, jynystyq zorlyq kórsetý qylmystarynan qorǵaý, Genderlik bilim ortalyǵyn qurý jáne basqa da taqyryptar bar, – dedi A. Balaeva.
Sonymen qatar, problemalyq máselelerdi sheshý úshin Ulttyq komısıa alańynda memlekettik organdardy jedel tyńdaý kestesi qalyptastyryldy.
Josparda Komısıanyń saraptamalyq-taldaý jumysyn júrgizý quraldary men tetikteriniń keń spektri kózdelgen. Atap aıtqanda, túrli beıimdeý jáne áleýmettik qoldaý ortalyqtaryn ádistemelik súıemeldeý qamtamasyz etiledi, qıyn ómirlik jaǵdaıǵa tap bolǵan balalar men analarǵa qajetti kómek kórsetý múmkindigin qamtamasyz etetin otbasylardyń áleýmettik kartasy jasalady.
Kún tártibi aıasynda balalar men jasóspirimderge rýhanı-adamgershilik tárbıe berý máselesi de qaraldy. Kámeletke tolmaǵandar arasyndaǵy turmystyq zorlyq-zombylyq pen qylmystyń aldyn alýǵa, balalarǵa qatysty quqyq qorǵaý quraldaryn damytýǵa baǵyttalǵan profılaktıkalyq sharalar kesheni usynyldy. Sonymen qatar, ata-analar úshin óz balalaryn tárbıeleýmen kóbirek aınalysýǵa múmkindikter jasaýǵa yqpal etetin quqyqtyq ortany damytý boıynsha naqty sharalar usynyldy.
Aqparat jáne qoǵamdyq damý vıse-mınıstri A.S. Danılov ortalyq jáne jergilikti deńgeılerdegi memlekettik basqarý júıesinde áıel basshylardyń áleýetin arttyrý boıynsha jobany iske asyrýdy usyndy.
– Jobany QR Prezıdentiniń janyndaǵy Áıelder isteri jáne otbasylyq-demografıalyq saıasat jónindegi Ulttyq komısıa egıdasy aıasynda BUU-nyń áıelder qurylymymen birlesip iske asyrý josparlanyp otyr. Jobaǵa túrli sarapshylar toby men basqa da halyqaralyq uıymdardy tartý kózdelýde. Joba aıasynda eldiń barlyq aımaǵyndaǵy áıelder men qyzdarǵa arnalǵan oqytý is-sharalary ótkiziledi (semınarlar, trenıńter, sheberlik sabaqtary koých sesıalar). Joba bıylǵy jyldyń shilde aıynda bastalady. Atalǵan joba eldiń saıası jáne qoǵamdyq ómirindegi áıelderdiń rólin kúsheıtýge septigin tıgizedi, –dep atap ótti.
Sonymen qatar, Ulttyq komısıa músheleri – Rıza Moldasheva men (Abaı oblysynan, «Semeı tańy» gazetiniń bas redaktory) Lázát Qojahmetovanyń («Talbesik» kóp balaly analar odaǵy» QB basshysy) baıandamasy tyńdaldy.
Olar otbasy, mektep jáne qoǵam arasyndaǵy baılanysty nyǵaıtý tetikterin keńeıtý jóninde usynystar aıtyp, otbasylyq qundylyqtardy nyǵaıtý, bala tárbıesindegi áke ınstıtýty máselelerine, problemalyq máselelerdi sheshý monıtorıńine jáne osy baǵyttaǵy komısıa qyzmetiniń perspektıvalaryna nazar aýdardy.
– Búgin biz azamattyq qoǵamnyń barlyq ınstıtýttaryn tarta otyryp, Prezıdenttiń genderlik saıasat salasy men barlyǵyna teń múmkindik berýge arnalǵan reformasyn ary qaraı iske asyrýǵa qajetti keshendi qadamdar qamtylǵan Jospardy bekittik. Komısıa Josparda kórsetilgen barlyq baǵyt boıynsha qoǵammen barynsha ashyq jáne jan-jaqty baılanys ornatyp, aldaǵy ortaq jumysymyzda aldyn-alý sharalaryna úlken mán berý kerek, – dedi Aıda Balaeva.
Otyrys sońynda Ulttyq komısıa tóraıymy memlekettik organdarǵa birqatar tapsyrmalar berdi.
