Keshe belgili oppozitsiialyq jýrnalist Aidos Sadyqovqa Kievte qastandyq jasaldy. Áieli Natalia Sadyqova ekeýi otyrǵan kólikke belgisiz bireý kelip, jýrnaliske oq atqan. Alǵan jaraqatynan keiin Aidos Sadyqov aýyr jaǵdaida jatyr. Bul oqiǵaǵa depýtat Ermurat Bapi pikir bildirdi. Onyń sózinshe, Aidosqa jasalǵan shabýylǵa Qazaqstannyń qatysy joq, - dep habarlaidy Dalanews.kz.
Ermurat Bapi Aidos Sadyqovty jaqsy biletinin, al "Báse" qatardaǵy oppozitsiialyq resýrs ekenin aitty.
"Birinshi kezekte bul - ókinishti jaǵdai. Qalai bolǵanda da tapa tal túste bir adamdy atyp ketý - qylmystyq is. Áldebir úshinshi kúshterdiń be, Qazaqstan men basqa elderde, batysta nemese qazirgi Ýkrainada júrip jatqan soǵysqa qatysýshy elderde basyn soǵystyryp qoiýǵa arnalǵan saiasi astary bar áreket pe dep oilaimyn. Men Aidosty óte jaqsy bilemin. Kezinde oǵan qylmystyq is qozǵalǵan kezde "Dat" gazeti ony qoldap, birneshe suhbatyn shyǵarǵanbyz. Qalai bolǵanda da "Báse" resýrsy - eldegi kóptegen oppozitsiialyq resýrstardyń biri, Qazaqstannyń biligine, eldegi saiasi jaǵdaiǵa qastandyq jasap, bilikke aralasýǵa, tartyp alýǵa ne bolmasa soǵan kúshterdi jumyldyrýǵa arnalmaǵan, bul - aqparattyq, tanymdyq, oppozitsiialyq resýrs. Onyń astarynda eshqandai da bir saiasi áreket joq. Elde bolyp jatqan jaǵdaidy aitatyn qatardaǵy kóptegen resýrstyń biri", - dedi ol.
Sondai-aq, depýtat bul qastandyqqa Qazaqstan biliginiń reaktsiiasy jóninde, Qazaqstannyń endigi áreketi qandai bolatyny týraly pikir bildirdi.
"Meniń oiymsha, Aidosqa qarsy jasalǵan áreketke Qazaqstan biliginiń qatysy joq dep oilaimyn. Oǵan ne kerek, ne qajeti bar?! Osyndai provokatsiialyq, halyqaralyq dárejedegi qastandyq áreketke aralasýǵa Qazaqstan múddeli emes dep oilaimyn. Qazaqstan tarapynan qandai qyzyǵýshylyq bolýy múmkin?! Aidos Qazaqstannyń biligine qaýip tóndirip júrgen saiasi tulǵa emes, ol - jýrnalist, kásibi qyzmetin atqaryp júrgen azamat. Osy turǵydan kelgende Aidos arqyly, Aidosqa qastandyq jasaý arqyly áldebir úshinshi kúshterdiń Qazaqstan men basqa elderdiń arasyndaǵy qarym-qatynasqa ot jaǵýdyń áreketi me dep oilaimyn. Ony mindetti túrde Qazaqstan tarapy Ýkrainanyń tergeý organdaryna shyǵyp, istiń mán-jaiyn anyqtaýdy suraýy kerek dep oilaimyn. Bylai aitqanda, talap etýine de bolady. Sebebi qalai bolǵanda da (Aidos - esk.) Qazaqstannyń azamaty. Bizdiń eldiń biligi óz azamatyn qai jerde júrse de qorǵaýy kerek. Onyń múddesin jaqtaýy kerek. Qazaqstannyń biligi óz tarapynan Ýkraina tarapyna usynystar jasaǵan shyǵar dep oilaimyn.
Sadyqovtardyń kásibi, saiasi kózqarasy qalai bolǵany mańyzdy emes. Eń mańyzdysy ol - Qazaqstan azamaty. Qai jerden baryp saiasi baspana alsa, ol - ekinshi kezektegi másele. Sondyqtan Qazaqstannyń biligi, Qazaqstannyń tiisti memlekettik organdary Ýkraina tarapyna shyǵyp, bul máselege aralasýy kerek, suraý salýy kerek. Bul halyqaralyq dárejede rezonans alǵan oqiǵa ǵoi. Bir eldiń azamatyn ekinshi bir elde atyp ketý degen, onyń ústine jýrnalist bolsa, oppozitsiialyq resýrstyń jetekshisi bolsa, mindetti túrde Qazaqstannyń tarapy aralasýy kerek. Ekinshiden, Qazaqstannyń buǵan eshqandai da qatysy joq ekenin dáleldeýi kerek qoi. Qazaqstan tarapy únsiz qalatyn bolsa, onda basqa da pikir týýy múmkin. Qazaqstannyń biligi bul iske mindetti túrde aralasyp, istiń mán-jaiyn bilýge áreket etýi kerek degen oiym bar", - dedi Bapi.
Buǵan deiin Ýkrainanyń Bas prokýratýrasy Sadyqovqa jasalǵan qastandyqqa bailanysty sotqa deiingi tergeý amaldary bastalǵanyn habarlaǵan edi.
Aita keteiik, Aidos Sadyqov Ýkrainada resmi bosqyn mártebesin alǵan. 2023 jyldyń qazan aiynda Sadyqovqa Qazaqstanda "áleýmettik, ulttyq, rýlyq, tektik-toptyq nemese dini alaýyzdyqty qozdyrǵany" úshin izdeý jariialanǵan bolatyn.
