كەشە بەلگىلى وپپوزيسيالىق جۋرناليست ايدوس سادىقوۆقا كييەۆتە قاستاندىق جاسالدى. ايەلى ناتاليا سادىقوۆا ەكەۋى وتىرعان كولىككە بەلگىسىز بىرەۋ كەلىپ، جۋرناليسكە وق اتقان. العان جاراقاتىنان كەيىن ايدوس سادىقوۆ اۋىر جاعدايدا جاتىر. بۇل وقيعاعا دەپۋتات ەرمۇرات باپي پىكىر ءبىلدىردى. ونىڭ سوزىنشە، ايدوسقا جاسالعان شابۋىلعا قازاقستاننىڭ قاتىسى جوق، - دەپ حابارلايدى Dalanews.kz.
ەرمۇرات باپي ايدوس سادىقوۆتى جاقسى بىلەتىنىن، ال "باسە" قاتارداعى وپپوزيسيالىق رەسۋرس ەكەنىن ايتتى.
"ءبىرىنشى كەزەكتە بۇل - وكىنىشتى جاعداي. قالاي بولعاندا دا تاپا تال تۇستە ءبىر ادامدى اتىپ كەتۋ - قىلمىستىق ءىس. الدەبىر ءۇشىنشى كۇشتەردىڭ بە، قازاقستان مەن باسقا ەلدەردە، باتىستا نەمەسە قازىرگى ۋكراينادا ءجۇرىپ جاتقان سوعىسقا قاتىسۋشى ەلدەردە باسىن سوعىستىرىپ قويۋعا ارنالعان ساياسي استارى بار ارەكەت پە دەپ ويلايمىن. مەن ايدوستى وتە جاقسى بىلەمىن. كەزىندە وعان قىلمىستىق ءىس قوزعالعان كەزدە "دات" گازەتى ونى قولداپ، بىرنەشە سۇحباتىن شىعارعانبىز. قالاي بولعاندا دا "باسە" رەسۋرسى - ەلدەگى كوپتەگەن وپپوزيسيالىق رەسۋرستاردىڭ ءبىرى، قازاقستاننىڭ بيلىگىنە، ەلدەگى ساياسي جاعدايعا قاستاندىق جاساپ، بيلىككە ارالاسۋعا، تارتىپ الۋعا نە بولماسا سوعان كۇشتەردى جۇمىلدىرۋعا ارنالماعان، بۇل - اقپاراتتىق، تانىمدىق، وپپوزيسيالىق رەسۋرس. ونىڭ استارىندا ەشقانداي دا ءبىر ساياسي ارەكەت جوق. ەلدە بولىپ جاتقان جاعدايدى ايتاتىن قاتارداعى كوپتەگەن رەسۋرستىڭ ءبىرى"، - دەدى ول.
سونداي-اق، دەپۋتات بۇل قاستاندىققا قازاقستان بيلىگىنىڭ رەاكسياسى جونىندە، قازاقستاننىڭ ەندىگى ارەكەتى قانداي بولاتىنى تۋرالى پىكىر ءبىلدىردى.
"مەنىڭ ويىمشا، ايدوسقا قارسى جاسالعان ارەكەتكە قازاقستان بيلىگىنىڭ قاتىسى جوق دەپ ويلايمىن. وعان نە كەرەك، نە قاجەتى بار؟! وسىنداي پروۆوكاسيالىق، حالىقارالىق دارەجەدەگى قاستاندىق ارەكەتكە ارالاسۋعا قازاقستان مۇددەلى ەمەس دەپ ويلايمىن. قازاقستان تاراپىنان قانداي قىزىعۋشىلىق بولۋى مۇمكىن؟! ايدوس قازاقستاننىڭ بيلىگىنە ءقاۋىپ ءتوندىرىپ جۇرگەن ساياسي تۇلعا ەمەس، ول - جۋرناليست، كاسىبي قىزمەتىن اتقارىپ جۇرگەن ازامات. وسى تۇرعىدان كەلگەندە ايدوس ارقىلى، ايدوسقا قاستاندىق جاساۋ ارقىلى الدەبىر ءۇشىنشى كۇشتەردىڭ قازاقستان مەن باسقا ەلدەردىڭ اراسىنداعى قارىم-قاتىناسقا وت جاعۋدىڭ ارەكەتى مە دەپ ويلايمىن. ونى مىندەتتى تۇردە قازاقستان تاراپى ۋكراينانىڭ تەرگەۋ ورگاندارىنا شىعىپ، ءىستىڭ ءمان-جايىن انىقتاۋدى سۇراۋى كەرەك دەپ ويلايمىن. بىلاي ايتقاندا، تالاپ ەتۋىنە دە بولادى. سەبەبى قالاي بولعاندا دا (ايدوس - ەسك.) قازاقستاننىڭ ازاماتى. ءبىزدىڭ ەلدىڭ بيلىگى ءوز ازاماتىن قاي جەردە جۇرسە دە قورعاۋى كەرەك. ونىڭ مۇددەسىن جاقتاۋى كەرەك. قازاقستاننىڭ بيلىگى ءوز تاراپىنان ۋكراينا تاراپىنا ۇسىنىستار جاساعان شىعار دەپ ويلايمىن.
سادىقوۆتاردىڭ كاسىبي، ساياسي كوزقاراسى قالاي بولعانى ماڭىزدى ەمەس. ەڭ ماڭىزدىسى ول - قازاقستان ازاماتى. قاي جەردەن بارىپ ساياسي باسپانا السا، ول - ەكىنشى كەزەكتەگى ماسەلە. سوندىقتان قازاقستاننىڭ بيلىگى، قازاقستاننىڭ ءتيىستى مەملەكەتتىك ورگاندارى ۋكراينا تاراپىنا شىعىپ، بۇل ماسەلەگە ارالاسۋى كەرەك، سۇراۋ سالۋى كەرەك. بۇل حالىقارالىق دارەجەدە رەزونانس العان وقيعا عوي. ءبىر ەلدىڭ ازاماتىن ەكىنشى ءبىر ەلدە اتىپ كەتۋ دەگەن، ونىڭ ۇستىنە جۋرناليست بولسا، وپپوزيسيالىق رەسۋرستىڭ جەتەكشىسى بولسا، مىندەتتى تۇردە قازاقستاننىڭ تاراپى ارالاسۋى كەرەك. ەكىنشىدەن، قازاقستاننىڭ بۇعان ەشقانداي دا قاتىسى جوق ەكەنىن دالەلدەۋى كەرەك قوي. قازاقستان تاراپى ءۇنسىز قالاتىن بولسا، وندا باسقا دا پىكىر تۋۋى مۇمكىن. قازاقستاننىڭ بيلىگى بۇل ىسكە مىندەتتى تۇردە ارالاسىپ، ءىستىڭ ءمان-جايىن بىلۋگە ارەكەت ەتۋى كەرەك دەگەن ويىم بار"، - دەدى باپي.
بۇعان دەيىن ۋكراينانىڭ باس پروكۋراتۋراسى سادىقوۆقا جاسالعان قاستاندىققا بايلانىستى سوتقا دەيىنگى تەرگەۋ امالدارى باستالعانىن حابارلاعان ەدى.
ايتا كەتەيىك، ايدوس سادىقوۆ ۋكراينادا رەسمي بوسقىن مارتەبەسىن العان. 2023 جىلدىڭ قازان ايىندا سادىقوۆقا قازاقستاندا "الەۋمەتتىك، ۇلتتىق، رۋلىق، تەكتىك-توپتىق نەمەسە ءدىني الاۋىزدىقتى قوزدىرعانى" ءۇشىن ىزدەۋ جاريالانعان بولاتىن.
