Altekeń, shyn máninde, óziniń kemeline jetip, ózin-ózi úlken ulttyq kóshbasshylyqqa daiyndap kele jatqan saiasatker edi.
2006 jylǵy aqpan aiyndaǵy qaiǵyly oqiǵalar bolmaǵan jaǵdaida, Altekeń 2012 jylǵy jáne odan keiingi prezident sailaýlaryna túsetin edi dep oilaimyn.
Qazaqtyń ulttyq sanasy, jigeri oianyp kele jatqan kezde onyń sailaýǵa túsip, belsendilik tanytýy, prezident Nursultan Nazarbaevqa shynaiy balama bolýy eldegi saiasi ahýaldy ózgerte alar edi dep senemin.
Tipti, sailaýǵa túspegenniń ózinde, oppozitsiiada júrip-aq biliktiń ultqa qatysty saiasatyna oń yqpal jasaityn edi. Átteń, degennen basqa ne deisiń?
Altekeńniń armandaryna keletin bolsaq, meniń paiymdaýymsha, onyń basty oiy – qazaq ulttyq memleketin quryp, onyń táýelsizdigi men tutastyǵyn máńgi saqtaý der edim.
Áli esimde, 2003 jyldyń basynda Altekeń Máskeýden Almatyǵy kelip, meni búgingi 28 panfilovshylar parkine shaqyryp aldy. Eki saǵattai serýendep júrip sóilestik.
Sonda jumystyń anyq-qanyǵy týraly surastyryp, sóziniń sońynda: «Aidosjan, men myna elshilikten ketetin boldym. Ári ketse jyldyń sońyna deiin bir jaǵyna shyǵaram. Reseidiń qysymy údep barady. Bizdiń shiki, aqsha dese anasyn satýǵa daiyn biliktegilerden úmit joq. Bulai kete berse, mynalar elimizdi Reseige bir-aq qosyp jiberýi de múmkin. Basshyǵa aita-aita sharshadyq, túsinbei me, qasaqana istei me, kim biledi? Ne de bolsa elge qaityp, qoǵamnyń arasyna enip, ultty oiatý kerek. Jabyq saiasatqa qarsy tek ashyq saiasatpen kúresýge bolady.
Alda Parlament sailaýy kele jatyr, soǵan myqty daiyndyq kerek. Ulttyń sana-sezimin oiatyp, onyń saiasi ustanymdaryn bilikke aiqyn kórsetý kerek» degen edi.
Aqyry sol jyldyń qarasha aiynda Altekeń elge oralyp, ashyq saiasatqa aralasyp ketti. Sol kezde ótken «Aqjol» partiiasynyń quryltaiynda teń tóraǵa bolyp biraýyzdan sailandy. Ózimen birge partiiaǵa qazaqtyń qaimaqtaryn, ult ziialylaryn ertip keldi.
