Aqmola oblysynyń Zerendi aýdanyndaǵy Aidabulka ózeninde balyqtyń qyrylýy týraly áleýmettik jelide jariialanǵan aqparattan keiin «Aidabul spirt zaýyty» AQ-qa qatysty jospardan tys tekseris júrgizildi, dep habarlaidy Dala news.
Oblystyq ekologiia departamentiniń málimetinshe, tekseris barysynda kásiporyn aýmaǵynda óndiristik nysandardan Aidabulka ózenine qarai baǵyttalǵan qubyr anyqtalǵan. Atalǵan qubyr arqyly jylý almastyrǵyshtardan shyqqan aǵyndy sý ruqsatsyz tógilgen.
Kásiporyn ókilderiniń túsindirýinshe, tógindi ysyrmanyń tolyq jabylmaýy saldarynan bolǵan.
Zerthanalyq taldaý nátijesinde tógindi ornynan alynǵan sý synamalarynda lastaýshy zattardyń shekti ruqsat etilgen kontsentratsiiasynan asýy tirkelgen. Bul sý nysanynyń lastanǵanyn rastady.
Sondai-aq kásiporynnyń ainalymdaǵy sý toǵanyna tógiletin aǵyndy sýlar da tekserildi. Nátijesinde organikalyq azotquramdy zattar boiynsha shekti mólsherden asý faktileri anyqtalǵan. Bul lastaný kásiporynnyń sharýashylyq qyzmetimen bailanysty ekeni kórsetildi.
Tekserý qorytyndysy boiynsha kásiporynǵa 21,3 mln teńge kóleminde ákimshilik aiyppul salyndy.
Budan bólek, anyqtalǵan zańbuzýshylyqtardy joiý jóninde nusqama berildi. Onda:
•tehnikalyq is-sharalar josparyn ázirleý jáne iske asyrý;
•qorshaǵan ortanyń lastanýyna jol bermeý sharalaryn qabyldaý;
•ózenge qaita lastaný qaýpin boldyrmaý úshin qubyrdy demontajdaý talaptary qamtylǵan.
Ekologiialyq zańnama talaptarynyń oryndalýy jáne berilgen nusqamanyń júzege asyrylýy turaqty baqylaýda bolady.
