HII Azamattyq forým qarsańynda Astanada Qazaqstan Respýblikasynyń Mádeniet jáne aqparat ministri Aida Balaevanyń úkimettik emes uiym (ÚEU) ókilderimen kezdesýi ótti, dep habarlaidy Dalanews.kz.
Jiyn barysynda Aida Balaeva sońǵy ýaqytta ÚEU men salalyq ministrlikterdiń basshylary arasynda onǵa jýyq kezdesý ótkenin atap ótti. Bul bailanys azamattyq qoǵamdy tolǵandyratyn birqatar ózekti máseleler boiynsha naqty sheshimder qabyldaýǵa múmkindik berdi. Ministrdiń pikirinshe, búgingi jiyn azamattyq sektormen áriptestikti odan ári nyǵaitýǵa baǵyttalǵan mańyzdy qadam bolmaq.
«Ulttyq quryltai otyrysynda Memleket basshysy qoǵamdaǵy ózekti máselelerdi sheshýde memleket pen úkimettik emes uiymdar arasyndaǵy seriktestikti arttyrýdyń mańyzyn atap ótip, ÚEU týraly zańnamany jáne memlekettik áleýmettik tapsyrystyń kriteriilerin jetildirýdi tapsyrdy. Osy maqsatta ministrlik quramyna óńirlik sarapshylar men azamattyq sektor ókilderinen turatyn jumys toptaryn qurdy», – dedi Aida Balaeva.
Ministrdiń aitýynsha, aldaǵy HII Azamattyq forým qoǵamdyq institýttardyń qyzmetin jańǵyrtýǵa jáne azamattyq qoǵamnyń damýyna jańa serpin bermek.
Kezdesýde qatysýshylar barlyq tirkelgen ÚEU men qaiyrymdylyq uiymdary týraly ashyq aqparatty qamtityn biryńǵai elektrondy portal (E-ÚEU) qurýdy usyndy. Bul júie uiymdardyń qyzmeti, memlekettik áleýmettik tapsyrystar men jobalardy iske asyrý kezeńderi týraly derekterdi ashyq formatta usynýǵa múmkindik beredi.
Sonymen qatar, azamattyq jaýapkershilikti arttyrý, volonterlikti damytý jáne qoǵamdaǵy kelispeýshilikterdiń aldyn alý úshin mediatsiia tetikterin engizý máseleleri talqylandy.
Ministrlik tarapynan Memleket basshysynyń tapsyrmalaryn iske asyrý boiynsha belsendi jumys júrgizilip jatqany atap ótildi. Atap aitqanda, úkimettik emes uiymdar týraly jańa zań jobasyn ázirleý maqsatynda óńirlik sarapshylar men ÚEU ókilderi qatysatyn jumys toptary quryldy.
Kezdesý qorytyndysy boiynsha memlekettik organdar men úkimettik emes sektor arasyndaǵy yntymaqtastyqty odan ári nyǵaitýǵa, sondai-aq qoǵamnyń damýyna baǵyttalǵan azamattyq bastamalardy qoldaýǵa baǵyttalǵan naqty usynystar ázirlendi.
