Qazaqstannyń Mádeniet jáne aqparat ministri Aida Balaeva otandyq kinoprokatta rekord ornatqan «QAITADAN» kórkem filmine qatysty pikir bildirip, shyǵarmashylyq ujymdy shyn júrekten quttyqtady,- dep habarlaidy Dalanews.kz
– Úsh aptadan beri otandyq kinoprokatta kósh bastaǵan «QAITADAN» kórkem filmi 1 mlrd teńgeden astam tabys tapqandyǵymen shyǵarmashylyq ujymdy shyn júrekten quttyqtaimyn! Bul – kino óndirisine jumsalǵan memleket qarajatyn bes esege artyǵymen aqtaǵan alǵashqy joba, – dedi ministr.
2023 jyly pitching jeńimpazy atanǵan «QAITADAN» – jas rejisser Dýman Erkimbektiń tolyqmetrajdy debiýti. Ministrdiń aitýynsha, mundai kreativti, bastamashyl ári otanshyl jastardy qoldaý – bárimizdiń ortaq mindetimiz.
Filmde otbasy institýty dáriptelip, áleýmettik jaýapkershilik pen adamgershilik qaǵidattary kórinis tapqan.
«Ár dialog qoǵamǵa oi tastaidy, ár kórinis kórermenniń júregine jaqyn», – dep atap ótti Aida Balaeva.
Qazirgi tańda «QAITADAN» elimizdiń barlyq kinoteatrlarynda kórsetilýde. Ministr kórermenderdi ulttyq kinony qoldaýǵa shaqyrdy.
– Filmnen jaǵymdy áser alyp, bir tolqynda bolyp, birge oi túieiik. Shynaiy eńbektiń baǵasyn berip, kinogerlerimizge dem bereiik, – dedi ol.
Aida Balaeva Memleket basshysynyń Ulttyq quryltaidaǵy sózin de eske saldy:
«Biz eń aldymen sanǵa emes, sapaǵa kóńil aýdarýymyz kerek. Kino ultty uiytyp, bolashaq urpaqty tárbieleýi tiis».
Ministrlik aldaǵy ýaqytta ulttyq kinony damytý baǵytyndaǵy jumystardy júieli túrde jalǵastyra beretinin málimdedi.
