Mádeniet jáne aqparat ministri Aida Balaeva áleýmettik jeli arqyly jelilik resýrstardyń ákimshileri men áleýmettik jeli qoldanýshylaryna úndeý jasady, dep habarlaidy Dalanews.kz.
Ministr qazir internet keńistiginde birqatar ózekti máseleler qyzý talqylanyp jatqanyn, monitoriń onlain-platformalarda kóbinese zańǵa qaishy, qarapaiym tilmen aitqanda, shyndyqqa janaspaityn aqparat jii taralatynyn atap ótti.
Osyǵan bailanysty jelilik resýrstardyń ákimshilerin jańalyqtar aǵynyn muqiiat qadaǵalap, rastalmaǵan aqparattyń taralýyna jol bermeýge jáne zańǵa qaishy kontentti joiýǵa shaqyramyn. Áleýmettik jeli qoldanýshylarynan da oilanbai áreket etpeýdi, sondai-aq zań talaptaryna sáikes onlain-platformanyń buǵattalýy múmkin jazbalar men pikirler qaldyrmaýdy suraimyn, – dep jazdy ministr.
Ministr milliondaǵan azamat jańalyqtardy onlain platformalardan alatynyn eskere otyryp, ministrlik tyiym salý sharalaryna sirek júginetinin atap ótedi. Degenmen, jelilik resýrstardyń ákimshileri de óz áreketteriniń saldaryn túsinip, aqparat taratýda eń aldymen oqyrman men qoǵam aldyndaǵy jaýapkershilikti jiti uǵynýǵa tiis dep esepteidi. Mynadai statistikany keltiredi: 2023 jyldan 2024 jylǵa deiingi aralyqta Qazaqstan internet segmentinde anyqtalǵan zańǵa qaishy kontent kólemi eki ese ósip, 116 354 materialǵa jetken. Eń kóp taralǵan zańbuzýshylyqtar qatarynda – terrorizmdi, dini ekstremizmdi jáne esirtki quraldaryn nasihattaý, onlain-kazino men qarjy piramidalaryn jarnamalaý bar. Byltyr onlain-platformalarda 78 539 zańǵa qaishy material anyqtalyp, onyń 24,3%-y joiylǵan.
Dostar, kez kelgen memlekettiń turaqtylyǵyn qamtamasyz etetin basty faktorlar – aýyzbirshilik pen yntymaq. Sondyqtan bárimiz memleket basshysy atap ótkendei, naǵyz quqyqtyq memleket qalyptastyrýdyń basty kilti sanalatyn zań men tártip qaǵidatyn berik ustanýymyz qajet, – deidi Balaeva.
