Aida Balaeva: «Atyraý – ulttyq salt-dástúrge berik, rýhy joǵary óńir»
Ministrdiń óńir aktivimen kezdesýine oblys ákimi Mahambet Dosmuhambetov qatysty.
Jumys sapar baǵdarlamasyndaǵy mańyzdy shara — Ministrdiń Atyraý oblysy Qoǵamdyq keńesiniń múshelerimen kezdesýi boldy. Aida Balaeva osy jyly qabyldanǵan zańnamalyq túzetýlerdi eskere otyryp, qoǵamdyq keńesterdiń qyzmetin úilestirý boiynsha atqarylyp otyrǵan jumys týraly aityp berdi. Ministr atyraýlyq Qoǵamdyq keńes múshelerin olarǵa berilgen zańnamalyq ókilettikterdi óńir igiligi úshin belsendi ári tiimdi paidalanýǵa shaqyrdy.
Odan bólek ótken, ziialy qaýym ókilderimen jeke kezdesý barysynda, Ministr «Ulttyq rýhani jańǵyrý» jobasyn tanystyryp, onyń negizgi úsh baǵyty boiynsha josparlanǵan is-sharalar týraly baiandady. Atap aitqanda: eldiń ziiatkerlik áleýetin jáne memlekettik tildiń mártebesin arttyrý, «El rýhy» atty mádeniet salasyndaǵy qyzmetterdiń qoljetimdiligin arttyrý boiynsha sharalar keshenin iske asyrý, sondai-aq «Táýelsizdik urpaqtary» atalatyn jastar úshin jańa múmkindikter jasaý baǵyty.
Eske sala keteiik, ulttyq joba jeti mindetti, 20-dan astam kórsetkishti jáne 60-tan astam iri is-sharany qamtidy.
Ministr A.Balaeva óz sózinde: «Atyraý óńiri – qai kezde de qazaqylyǵyn joǵaltpaǵan, ulttyq salt-dástúrge berik, rýhaniiaty joǵary meken.
Biz qazir «Rýhani Jańǵyrý» baǵdarlamasy aiasynda ótken tarihymyzdy túgendep, kóptegen oqiǵalarǵa jańasha baǵa berip jatyrmyz. Bul jumysta, osy mańyzdy óńirdiń tarihyn túgendep, rýhaniiatyn kóterip, óskeleń urpaqqa ulttyq tárbie berip, durys jol kórsetetin el ziialylylary — sizderdiń qoldaýlaryńyz qajet». Ministr el damýynda Memleket basshysy ulttyq intelligentsiianyń róline erekshe mańyzdy kóńil bóletinin aita otyra, Ulttyq jobany jergilikti jerlerde júzege asyrýǵa belsendi atsalysýǵa shaqyrdy.
Atyraý oblysyna jumys saparynyń sońynda Ministr Jylyoi aýdanyna baryp, jergilikti turǵyndarmen kezdesip, Aqmeshit qorymyna bardy.
Aita keteiik, qazir eldegi epidemiologiialyq ahýaldy birtindep qalypqa keltirýdiń arqasynda ministrlerdiń óńirlerge shyǵýlary jáne halyqpen kezdesýleri turaqtalyp keledi.
Buǵan deiin Memleket basshysynyń tapsyrmalaryn iske asyrý maqsatynda A.Balaeva osyndai kezdesýlerdi Nur-Sultan, Almaty qalalarynda, sondai-aq Batys Qazaqstan oblysynda ótkizgen bolatyn.
