Shyǵys Qazaqstanda aýa –raıynyń kúrt jylýy jáne tolassyz jaýǵan jaýyn-shashyn kesirenen 229 úıdi sý basqan. Olardyń 8-i qulap qalǵan, 10-y apattyq jaǵdaıda, 193-i aýla, 110-y saıajaı. Eń kóp zardap shekken óńir Aıagóz aýdany bolyp otyr. Munda 189 úıge sý kirip ketken.
– Eń qıyn jaǵdaı Aıagózde bolǵan. Biz bul máseleni sheshe aldyq. Qaýipsiz jerge kóshirilgen turǵyndardyń kópshiligi óz úılerine oraldy. Qazir 73 adam mektep-ınternatta jatyr. Olarǵa jer-jerden gýmanıtarlyq kómek kelýde. Aýdanda zardap shekkenderge kómek berý maqsatynda «Aıagóz-Bolashaq» qory jumys istep tur. Búgin tańerteń sol qordyń esep shotyna ózimniń bir aılyq eńbekaqymdy aýdardym, – dedi Danıal Ahmetov.
Al, oblystyq «Paryz» qorynan búgin túste 50 mln teńge jiberilgen. Aımaqtyń din ókilderi de alǵashqylardyń biri bolyp, jylý jınaýǵa kiriskenin aıta ketý kerek. Oblystyq meshittiń uıytqy bolýymen «Shyǵys asary» aksıasy uıymdastyrylǵan. Aksıa aıasynda oblystyń kez-kelgen turǵyny alǵashqy qajettilik zattary men azyq-túlikti meshitterde ashylǵan pýnkterge ótkize alady.
Sondaı-aq, «Nur Otan» partıasy men «Jas Otan» jastar qanaty gýmanıtarlyq kómek qabyldaý pýnkterin ashqan. Al qoǵamdyq belsendiler men kásipodaq ókilderi respýblıka kóleminde «Tasqyn-2018» aksıasyn qolǵa alyp, 10 tonnaǵa jýyq gýmanıtarlyq kómek jınaǵan.
Aımaq basshysy, tabıǵat apaty saldarynan baspanasynan aıyrylǵan eshbir otbasy dalada qalmaıtynyn qadap aıtty.
