"Búgin bizdiń óńir úshin óte aýyr kún boldy. Órt kezinde qaza tapqan kent turǵyny Galına Fılaretovna Spıvakovanyń týystary men jaqyndaryna qaıǵyryp kóńil aıtamyn. Sondaı-aq, tabıǵı apattan zardap shekken azamattarǵa zor densaýlyq pen tezirek saýyǵýlaryn tileımin", - dedi ákim.
Onyń aıtýynsha, Úkimet pen oblys ákimdigi tarapynan sizderge jan-jaqty qoldaý men kómek kórsetiledi! Órtten zardap shekkenderdiń barlyǵy baspana alady!
Bul jumys el Prezıdenti Qasym-Jomart Kemeluly Toqaevtyń erekshe baqylaýynda ekenin atap ótkim keledi.
Qazirgi ýaqytta, rastalǵan aqparatqa sáıkes, 35 úı men 9 ǵımarat órtendi.
Danıal Ahmetovtyń aıtýynsha, aldyn ala esep boıynsha, turǵyn úı máselesin tolyq sheshý úshin bizge eki jarym aı qajet.
"Turǵyndarmen kezdesý barysynda jumys josparyna toqtalyp, barlyq jaǵdaıdy búkpesiz baıandap berdim. Rıdderde salynyp bitpegen birneshe kópqabatty úıler bar, olardy biz satyp alyp, qurylysyn aıaqtaýdy mejege alyp otyrmyz. Bul baspanalar kirpishten jasalǵan, búgin kezdesýden keıin bireýiniń jaǵdaıyn jeke ózim baryp kórdim. Tańerteń qurylys kompanıalarymen birge qalǵan úılerdi baǵalap shyǵamyz", - dedi ol.
Ákim eger kimde-kim kópqabatty turǵyn úıden bas tartsa jáne eskisin jóndeýdi talap etse, ony jóndep beretinderin basa aıtty.
Qujattardy qalpyna keltirýge qatysty jumyspen polısıa departamenti men HQKO búginnen bastap aınalysatyn boldy. Barlyq qujattardy birqalypty tártipte qalpyna keltiredi.
"Múliktik shyǵyndarǵa keletin bolsaq, tólemder zańǵa sáıkes júzege asyrylady. Arnaıy komısıa jumys istep, shyǵyndardyń qunyn anyqtaıdy jáne zańnama erejelerine sáıkes ótemaqymen aınalysady, - dep atap ótti Ahmetov.
Agrotehnıkalyq kolej jataqhanasy men profılaktorıı bazasynda barlyq zardap shekkenderdi qonystandyrý úshin oryndar uıymdastyryldy.
Aldaǵy eki-úsh kúnde órttiń sebebi anyqtalady.
