Oblys ákimi Danial Ahmetov Abai aýdanyna jasaǵan is-sapary kezinde atqarylǵan jumystyń barysymen tanysyp qaitty.
Búginde Abai Qunanbaevtyń týǵan jerindegi «Syrt Qasqabulaq» stellasy qurylysy bastalyp, jóndeý jumystarynyń birinshi kezeńi aiaqtaldy. ⠀
Sondai-aq, Aqshoqyda Qunanbai áýletiniń qorymy jańartylyp, murajai qurylysy da bastaldy.
Danial Ahmetov aityp ótkendei, mundaǵy basty mindet - Uly Abai ómirge ákelgen ata-anasyna qurmet kórsetý.
- Mýzei qazaq halqynyń dástúrli qundylyqtary men urpaqtarynyń sabaqtastyǵyn saqtaý turǵysynan óte mańyzdy nysan ekenin erekshe atap ótkim keledi, - dedi aimaq basshysy óz sózinde.
Jidebaidaǵy memorialdyq keshende de aýqymdy jóndeý jumystary júrgizilýde.
- Shilde aiynyń sońyna qarai Qaraýyl aýylyndaǵy 300 oryndyq jańa mekteptiń jáne dala sahnasy ornalasatyn saiabaqtyń qurylysy aiaqtalatyn bolady. Qurylysy fýnktsionaldy saiabaq jergilikti jastardyń súiikti demalys ornyna ainalady dep oilaimyz. Josparǵa sáikes jergilikti turǵyndardy aýyz sýmen qamtamasyz etetin sý qubyrynyń qurylysy júrgizilýde, - dedi Danial Ahmetov.
Jalpy, aýdanda "Jumyspen qamtýdyń jol kartasy - 2020" baǵdarlamasy aiasynda 30-dan astam joba iske asyrylýda. Olardyń ishinde boi kóteretin 62 million teńgege sahnamen jabdyqtalǵan ippodromdy, aǵash kóshetterin otyrǵyzý jumystaryn, tórt aýyldyq okrýgte júrgiziletin jol qurylysy jumystaryn, bir eldi mekendegi kópir jóndeý jumystaryn aitýǵa bolady.
Sondai-aq, Qaraýyl aýylynda jáne odan bólek tórt aýylda jol jóndeý jumystary júrgizilip, aýyl kósheleri tolyqtai jaryqtandyrylmaq.
5 myńdai turǵyny bar Qaraýyldy tolyqtai taza aýyzsýmen qamtý da josparda bar. Abai aýdany oblystaǵy aýdan, qalalar ishinde oza shaýyp, 100 paiyz aýyzsýmen qamtylǵan aimaqtardyń birine ainalmaq.
Jalpy, Abai aýdanyndaǵy atalmysh nysandardy qaita qurýǵa barlyǵy 150 million teńgeden astam qarajat jumsalady.
