Sotta marqum Sherzat Bolattyń anasy Gúlbara Bishimbieva jaýap berip jatyr. Ol qaiǵyly oqiǵa bolǵan túndi baiandady, - dep habarlaidy Dalanews.kz.
Jábirlenýshi tarap ókiliniń sózinshe, dúken aldynan on-on bes shaqty adam kórgen.
"Bular Nurǵanat pen Sherzatqa jabylyp ketedi. Sol kezde ájesi júgirip keledi de "balalarym, qoiyńdar" dep aityp jatqan kezde Abzal qolynan julqyp jiberedi. Men Sherzatqa júgirip bara jatqan kezde Abzal men Nurbol qolymnan ustap alady. Olarǵa jibermeidi. Odan keiin Abzal men Nurbolǵa "meniń balama timeńdershi, anasymyn" dep ótindim. Sol kezde Abzal maǵan "aýzyńdy jap, qazir seni de óltiremiz" dedi. Dúken jaqqa qaraǵanymda eki qyzdy kórdim. Eki qyzǵa qarap, "jedel járdem, politsiia shaqyryńdarshy" dedim. Ol qyzdar maǵan qarap turdy, eshteńe istegen joq. Qolymnan julqyp, Sherzatqa qarai shyǵyp kettim. Ol kezde 7-8 adam Nurǵanat pen Sherzatqa jabylyp jatady. Sol kezde Sherzat artqa shegindi de qulady. Sol kezde Sherzattyń aýzynan burq etip qan aqqanyn kórdim. Sherzatqa júgirip bardym. "Mama, myna jerimdi qarańyzshy" dep, sol jaǵyn kórsetti. Pyshaq salǵanyn kórdim", - dedi ol.
Sherzat Bolattyń ólimi týraly ne belgili?
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵanan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
