Shymkentte qaza tapqan sarbaz Daniiar Amalbekovtiń ákesi Serik Amalbekov áskeri qyzmetkerler ulyn aýrý dep kórsetýge májbúrlegenin jetkizdi, dep habarlaidy Dalanews.kz.
“Meni birneshe úi arasyna aparyp, kólikke otyrǵyzyp, videoǵa túsirdi. Men olardyń aitqan sózderin qaitalaýǵa májbúr boldym”, – deidi Serik Amalbekov Halyqstan telegram arnasyna bergen suhbatynda.
Sondai-aq marqumnyń ata-anasy uldarynyń leikoz aýrýyna shaldyqqany týraly aqparatty joqqa shyǵardy. Aitýlarynsha, mundai málimetti rastaityn resmi qujat joq.
“Pýnktsiia tek 5 qańtarda jasaldy. Al 6 qańtarda ol ómirden ozdy. Bizdiń balamyzdy azaptady. 11 jeltoqsannan bastap ony túrli aýrýhanaǵa apardyq. Barlyǵy tórt statsionarda boldy, memlekettik de, jeke de. Biraq nege ony áskeri gospitalǵa baǵyttamady?” – dedi Daniiardyń anasy Gaýhar Sársebaeva.
Týystarynyń sózinshe, leikozǵa júrgizilgen taldaýdyń nátijeleri tek kelesi aptada daiyn bolady.
Aita keteiik, kúni keshe Shymkentte áskeri boryshyn óteýge barǵan sarbaz qaitys bolǵany týraly jazǵan edik.
Shymkent qalasyndaǵy 6506 áskeri bóliminiń sarbazy Daniiar Amalbekov ásker qataryna Jambyl oblysynan shaqyrylǵan.
“6 qańtarda onyń júregi kenetten toqtap qaldy. Ol qalalyq aýrýhanalardyń birinde qaitys boldy. Aldyn ala qoiylǵan diagnoz – "jedel leikemiia", – dep habarlady Ulttyq ulannyń baspasóz qyzmeti.
Marqumnyń týystary onyń aýrýhanaǵa túskeni týraly birneshe aptadan keiin ǵana bilgenin aitady. Alǵashynda "pnevmoniia" delinip, keiin "emdelip shyqty" degen aqparat berilgen.
Týystary "Saý bala áskerge ketip, bir aidan keiin tabytpen oraldy" dep otyr.
