Almatydaǵy “Premera” turǵyn úi kesheniniń turǵyndary Tóle bi kóshesinde júrgizilip jatqan jol jumystaryna narazylyq bildirdi. Olardyń aitýynsha, qurylys aiasynda negizgi kósheden keshen aýlasyna kólik ótetin jańa jol salynyp jatyr. Turǵyndar jol ashylǵan soń keptelisten qashqan júrgizýshiler aýlany ainalma baǵyt retinde paidalanýy múmkin dep alańdaidy, dep habarlaidy dalanews.kz.
Áleýmettik jelide taraǵan videodan turǵyn úi mańynda arnaiy tehnikamen jol jiegi qazylyp, qurylys jumystary júrgizilip jatqanyn kórýge bolady.
Turǵyndardyń sózinshe, negizgi kósheden aýlaǵa kólik ótetin jańa jol №2 úidiń dál aldyna salynyp jatyr. Olar bul jol ashylsa, kólik qozǵalysy kóbeiip, aýla turǵyndaryna qolaisyzdyq týdyratynyn jetkizdi.
"Turǵyn úi kesheniniń ishki joldary onsyz da tar, al aýlada kún saiyn balalar, egde jastaǵy adamdar men múmkindigi shekteýli turǵyndar júredi", - deidi video avtory.
Olar tótenshe jaǵdai týyndaǵan jaǵdaida jedel járdem, órt sóndirý kóligi jáne basqa da arnaiy tehnikanyń aýlaǵa kedergisiz kirip-shyǵýy qiyndaýy múmkin ekenin de alǵa tartty.
"Qazirdiń ózinde mundaǵy jol tar. Al endi turǵyn úi kesheni arqyly is júzinde tranzittik jol jasaýdy josparlap otyrǵandai. Mundai jaǵdaida órt sóndirý kóligi nemese jedel járdem qalai ótedi?", – deidi turǵyndardyń biri.
Jergilikti jurt ákimdikke birneshe ret júgingen
Áleýmettik jelidegi pikirlerde turǵyndar másele boiynsha buǵan deiin memlekettik organdarǵa resmi ótinishter joldaǵanyn, alaida jaǵdai sheshilmegenin jazǵan.
"Barlyq memlekettik organǵa birneshe márte resmi hat jiberildi. Ázirge reaktsiia joq. Bul, eń aldymen, balalar úshin qaýipti. Kireberisten shyqqan balalar jan-jaǵyna qaramai júgirip shyǵýy múmkin. Endi kólikter keptelisti bizdiń aýla arqyly ainalyp ótetin bolsa, qaýip arta túsedi", – deidi olar.
Taǵy bir turǵyn qurylys jumystary kezinde shań men shý kóbeigenin, kólik qozǵalysy qiyndaǵanyn aityp, aýdan ákimdigin jaǵdaiǵa nazar aýdarýǵa shaqyrǵan.
Turǵyndardyń sózinshe, "Premera" – Naýryzbai aýdanyndaǵy iri turǵyn úi keshenderiniń biri. Olar jol infraqurylymyn damytýǵa qarsy emes ekenin, alaida jańa sheshimder osy aýmaqta turatyn adamdardyń qaýipsizdigi eskerile otyryp qabyldanýy qajet ekenin atap ótti.
"Biz qalanyń damýyna nemese jol qurylysyna qarsy emespiz. Alaida jańa infraqurylym turǵyndardyń qaýipsizdigine jáne kúndelikti ómirine qolaisyzdyq týǵyzbaýy kerek. Sondyqtan qandai da bir sheshim qabyldamas buryn jaǵdaidy jergilikti jerde baǵalap, turǵyndardyń pikirin eskerýdi suraimyz", – delingen úndeýde.
Turǵyndar Almaty ákimdigi men Naýryzbai aýdanynyń ákimdiginen qurylys alańyna baryp, jobanyń qaýipsizdik talaptaryna sáikestigin tekserýdi jáne jańa kireberistiń turǵyn úi keshenindegi kólik qozǵalysyna qalai áser etetinin túsindirýin talap etti.
