Jýrnalist Jarylqap Qalybai aqyn Muhtar Shahanovtyń aqyrǵy amanatyna bailanysty pikir bildirdi, dep habarlaidy Dalanews.kz.
Onyń aitýynsha, aqyn kózi tirisinde Arystan bab kesenesiniń aýmaǵyna Ózbekáli Jánibekovtiń janyna jerlengisi keletinin aitqan. Alaida qazirgi sheshim boiynsha, Shahanov Qoǵam aýyldyq ziratyna qoiylmaq.
"Qoǵam degen aýyl bar. Ol jerde Kópen Ámirbek jatyr. Qazaq tili qoǵamyn basqarǵan Ómirzaq Aitbaev aǵamyz jatyr. Shahanovty sol Qoǵamǵa jerlemekshi bolyp, sheshim shyǵaryp qoidy. Ol 4-5 km qashyqtyqta. Jurt Arystan babqa keledi de, sol jerden qaityp ketedi. Olar aýyldyń bir shetine barmaidy. Biz siiaqty biletin adamdar bolmasa, kópshilik barmaidy", - deidi Jarylqap Qalybai.
Jarylqap Qalybaidyń pikirinshe, mundai sheshim aqyn amanatyna qaishy kelýi múmkin. Ol Shahanovtyń negizgi maqsaty — qasietti orynǵa keletin adamdardyń jol-jónekei ózine de quran baǵyshtap, taǵzym etýi bolǵanyn atap ótti.
«Arystan babqa kelgen jurt qaiyrylyp, maǵan da quran oqysa eken degen niet boldy. Aýyldyń shetine jerleý – amanatqa qiianat», – dedi ol.
Aita keteiik, buǵan deiin aqynnyń jary Hanshaiym Shahanova Qazaqstan Prezidenti ákimshiligine hat joldap, Shahanovty tikelei Arystan bab kesenesiniń aýmaǵyna jerleýdi suraǵan. Ol bul ótinishti aqynnyń sońǵy tilegimen bailanystyrǵan.
Degenmen, keiinirek aqynnyń kesene aýmaǵyna emes, Qoǵam aýyldyq ziratyna jerlenetin boldy. Bul sheshim qoǵamda qyzý talqylanyp, synǵa ushyrap jatyr. Syn aitýshylardyń kópshiligi aqynnyń amanaty tolyq oryndalmai otyr degen pikirde.
Búgin alashtyń aiaýly aqynynyń janaza namazy Otyrardaǵy týǵan aýylynda oqylyp, denesi aýyl mańyndaǵy beiitke jerlendi.
