Bas prokýror Berik Asylov elimiz boiynsha júzdegen aýyl óz erkimen spirtti ishimdikterdi satýdan bas tartyp jatqanyn aitty, – dep habarlaidy Dalanews.kz.
Onyń sózinshe, bul — qarapaiym halyqtyń sanaly tańdaýy.
"Tártip, densaýlyq jáne balalarynyń bolashaǵy úshin jasalǵan sheshim. Máselen, Mańǵystaý oblysynyń Mańǵystaý aýdanyndaǵy bir aýylda turǵyndar ishimdikti satýdan óz erkimen bas tartyp, bul týraly beinerolikti áleýmettik jelilerde jariialady. Osyndai mysaldar Aqmola, Jambyl, Qaraǵandy, Atyraý jáne basqa da oblystarda kezdesedi.
Iá, bul eldegi barlyq aýyl sanyn eskersek, teńizge tamǵan tamshydai kórinýi múmkin. Biraq bastysy jaǵdaidyń oń serpini bar", - deidi Asylov.
Bas prokýror mundai eldi mekender sany artyp kele jatqanyn da jetkizdi.
"Adamdar senim men turaqtylyqty, tynyshtyqty joǵary baǵalap, bir-birine úlgi bola bastady. Bastama aýyl aqsaqaldary men Qoǵamdyq keńesterden shyǵyp, prokýratýra, politsiia jáne jergilikti ákimdikterdiń tarapynan úilestirý, aldyn alý jáne qaýipsizdik qamtamasyz etildi.
Aýyl kásipkerleri erekshe alǵysqa laiyq. Jerlesteriniń únin estip, olar dúken sórelerinen ishimdikti óz erkimen alyp tastady. Kúmándanǵanmen, tabystary azaiǵan joq. Kerisinshe, aýyl turǵyndary ishimdiktiń ornyna balalarǵa paidaly azyq-túlikterdi jii satyp ala bastady", - dedi ol.
Berik Asylov nátije kóńil qýantatynyn jetkizdi. Onyń sózinshe, keibir aýyldarda qylmys múlde joiylǵan, turmystyq janjaldar toqtaǵan, jastar sport pen sanaly ómir saltyn tańdai bastaǵan.
Aita keteiik, resmi statistika boiynsha biylǵy jyldyń alǵashqy úsh aiynda alkogolge mas kúide jasalǵan qylmystar sany azaiǵan.
