Astanada Aýyl sharýashylyǵy ministrliginiń tanymal bloger Kirill Pavlovqa qarsy ákimshilik isi boiynsha sot protsesi bastaldy, dep habarlaidy Dalanews.kz.
Orda.kz málimetinshe, ministrlik blogerdi áleýmettik jelide shyndyqqa janaspaityn aqparat taratty dep aiyptap otyr. Atap aitqanda, Pavlovtyń sarancha shapqynshylyǵy men memleket tarapynan júrgizilip jatqan kúres sharalaryna qatysty jazbasy daý týǵyzdy.
“AShM-nyń 2024 jylǵy shildedegi esebine sáikes, prýsqa qarsy 96 myń gektar jer óńdelgen. Qaǵaz júzinde bári ádemi kórinedi. Biraq bul óńirde prýstyń taralý aimaǵy 5 million gektardan asatynyn bilseńiz, jaǵdai ózgerip shyǵa keledi. Iaǵni, shamamen 2%-y ǵana óńdelgen. Al esepte bul – naýqandy jeńis siiaqty berilgen”, – dep jazdy Pavlov.
Ministrlik bul málimetti jalǵan dep esepteidi jáne bloger vedomstvonyń iskerlik bedeline nuqsan keltirdi dep sanaidy. Sotta ministrliktiń ókili Kirill Pavlov jazbalaryndaǵy aqparatty qaidan alatynyn anyqtaýǵa tyrysty. Vedomstvonyń advokaty Venera Tapaeva blogerden sarancha taqyrybynda jazýǵa qandai kásibi quqyǵy baryn surady.
“Siz agroónerkásip salasynda akkredittelgen mamansyz ba?” — dep suraqtyń astyna alǵan advokat, Kirill Pavlovtyń AQSh-pen bailanysy bar ekenin de alǵa tartty.
“Siz Qazaqstandaǵy máselelerdi Amerikamen birlese sheship jatqanyńyz jóninde úkimetti qulaǵdar ettińiz be? Bul ne aqparattyń syrtqa shyǵýy, ne el ishinde turaqsyzdyq týǵyzý áreketi”, — dep narazylyq bildirdi Tapaeva sot otyrysynda.
Alaida sýdia bul suraqty alyp tastap, advokattyń sózin bólip toqtatty. Sot protsesi búgin, 5 maýsymda jalǵasady.
