Elbasynyń 2018 jyldyń 5 qazanyndaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna arnaǵan Joldaýyn talqylaý maqsatymen kelgen vıse-premer aýdandaǵy «DALA-FRUIT.KZ» JSHS men «Nurym Group» JSHS-nde bolyp, ondaǵy sharýashylyqtyń búgingi jaı-kúıimen tanysty.
Eń aldymen, «DALA-FRUIT.KZ» JSHS-niń qarqyndy baý sharýashylyǵyndaǵy birshama jetistikterge kýá bolǵan Ó.Shókeev oblysta jemis-jıdek, júzim sharýashylyǵynyń egis kólemin ulǵaıtý, gektar túsimdiligin arttyrý máselesi barlyq ýaqytta kún tártibinen túspeı, árdaıym damyp kele jatqanynan habardar boldy.
Aıta ketsek, qarqyndy baý sharýashylyǵyn memlekettik qoldaýdyń arqasynda, jemis-jıdek daqyldary men júzimniń kópjyldyq ekpeleriniń kólemi jyldan-jylǵa ulǵaıýda.
Sonymen qatar, baý aralyq agrotehnologıalardy júrgizý úshin qajetti tehnıkalarǵa jáne satylyp alynǵan sheteldik, otandyq kóshetterge sýbsıdıa tólenýde. Bul kómekter taýar óndirýshilerdiń qarqyndy baý egýge degen qyzyǵýshylyǵyn arttyryp, aǵymdaǵy jyly 0,9 myń ga jemis, 0,4 myń ga júzim, 0,2 myń ga jańǵaq, 0,1 myń ga tańqýraı egildi.
