Konstitýtsiialyq reforma jónindegi komissiianyń 12-shi otyrysynda «Aýyl» partiiasynyń tóraǵasy Serik Egizbaev qoǵamnan kelip túsken san myńdaǵan usynys-pikirler negizinde ázirlengen jańa Konstitýtsiia jobasyna qatysty óz kózqarasyn bildirdi, dep habarlaidy Dalanews.kz.
Óz sózinde spiker bul qujattyń eldegi ózekti qoǵamdyq suranystarǵa tolyq jaýap beretinin, azamattardyń talap-tilegi eskerilgenin aitty.
«Talqylaý barysynda qoǵamnan kelip túsken myńdaǵan usynystar eskerilgen, elimizdiń bolashaqtaǵy damý barysyn, azamat pen memlekettiń ózara qarym-qatynasynyń jańa modelin, memlekettik basqarýdyń baǵyt-baǵdaryn aiqyndaityn jańa Konstitýtsiiamyzdy halyqtyń sheshimine usynǵaly otyrmyz», – dedi ol.
Serik Egizbaevtyń sózinshe, qujattyń negizinde adam jáne adami qundylyqtar, bilik tarmaqtarynyń teńgerimi, zań ústemdigi men áleýmettik ádilettilik qaǵidattary jatyr.
Munymen qosa, spiker «Aýyl» partiiasynyń tarapynan respýblika óńirlerinde Konstitýtsiia jobasyn túsindirý boiynsha keń aýqymdy jumystardyń júrgizilgenin jetkizdi.
«Qaraǵandy, Qyzylorda, Soltústik Qazaqstan, Qostanai, Kókshetaý, Shymkent jáne ózge de óńirlerde halyqpen kezdesýler uiymdastyrylyp, eldiń pikiri tolyq eskerildi», – dedi «Aýyl» partiiasynyń tóraǵasy.
Onyń aitýynsha, aýyl turǵyndary usynylyp otyrǵan ózgeristerdi qur zańnamalyq túzetýler retinde emes, ózderiniń turmys-tirshiligine naqty yqpal etetin ómirlik mańyzy bar qadamdar dep qabyldaýda. Kezdesýler barysynda azamattar bul bastamanyń taǵdyryn halyqtyń ózi aiqyndaýy qajet degen ortaq ustanym bildirip, qujatty jalpyhalyqtyq sheshim arqyly bekitýdiń mańyzy erekshe ekenin atap ótken.
«Osy oraida mańyzdy bir jaitty aitqym keledi: kezdesýlerde barlyq azamattar bir aýyzdan: «Bul qujatty halyqtyń sheshimimen bekitetin ýaqyt jetti» degen pikirdi jii aitty. Sondyqtan, Konstitýtsiia jobasyn jalpyulttyq referendýmǵa shyǵarýdy usynamyn. Barlyq otandastyrymyzdy jańa Konstitýtsiiamyzdy qoldaýǵa shaqyramyn!», – dep qorytyndylady sózin Serik Egizbaev.
