Sharaǵa «Aýyl» partiiasynan kandidattar Tańsáýle Serikov, Anas Baqqojaev, Qairat Aitýǵanov, Iliias Doshojaev, Nikolai Arsiýtin, Svetlana Prokopeva, Qýanysh Seiitjanov jáne Aidar Sattarov qatysty.
Kezdesý Qosshy qalasynda, negizinen, inkliýzivti baǵytta ótti.
Erekshe qajettiligi bar tulǵalardyń quqyqtyq, áleýmettik jaǵdaiy talqylandy. Jiyn tuzdyǵy aýylda turatyn múgedek jandardyń jaǵdaiy, olardyń orta, joǵarǵy bilim alýy múmkindigi boldy. Jinalǵandar aldynda sóz alǵan Májilis depýtattyǵyna túsýshi erekshe qajettiligi bar kandidat, PhD doktor Tańsáýle Serikov óz ómirinen mysaldar keltire otyryp, jiynǵa qatysýshylardy «Aýyl» partiiasyna daýys berýge shaqyrdy.
– «Aýyl» partiiasyna ne úshin keldim? Sebebi, «Aýyl» partiiasynan jasymas jigerdi kórdim. Onyń ustanymy halyqtyń, ásirese aýyldyqtardyń oi-armanymen, maqsat-múddesimen úndesedi. Partiia baǵdarlamasy jattandy qurǵaq ýádeden ada. Ol aýyldyq jerde keminde 20 jyl jumys istegen azamattarǵa zeinetaqyny, onda turatyn erekshe qajettilikteri bar barlyq azamatqa áleýmettik járdemaqylardy ulǵaitý, az qamtylǵandar men áleýmettik osal toptar ókilderi úshin azyq-túlik tólem kartochkalaryn engizý týraly máselege bastamashylyq jasaýǵa umtylý arqyly «Aýyl» shoqtyǵyn basqa partiialardan biik ustaidy.
«Saýsaq birikpei ine ilikpeidi» demekshi, biz biriksek talai ilkimdi isti júzege asyramyz, taǵdyrlas baýyrlarymyzǵa múmkindik pen úmit syilaimyz, – dedi kandidat, QR Ǵylym jáne bilim ministriniń keńesshisi Tańsáýle Serikov.
Jiyn sońynda erekshe qajettiligi bar jandardan quralǵan «Qanattylar» tearty is-sharaǵa qatysýshylarǵa teatrlandyrǵan kórinis qoiyp, merekelik kóńil kúi syilady.
Kandidattar inkliýzivti jiynnan keiin Qosshy turǵyndarymen kezdesip, úgit-nasihat jumystaryn júrgizdi. Olarǵa «Aýyl» partiiasynyń sailaýdaǵy baǵdarlamasyn, atap aitqanda qala turǵyndaryn aýyl kásipkerligin investitsiialaýǵa tartý, qajetti ekonomikalyq yntalandyrýlar men quqyqtyq kepildikter bere otyryp, «qalalyq» biznesti aýyldarǵa kóshirý týraly taldap túsindirdi.
