Astanada «Aýyl» halyqtyq-demokratiialyq patriottyq partiiasynyń kezekten tys XXIII sezi ótti, oǵan partiianyń barlyq jiyrma óńirlik filialdarynan delegattar qatysty.
Sezde qaralǵan basty suraq jańa tóraǵany sailaý boldy.
«Parlament Májilisindegi «Aýyl» saiasi fraktsiiasynyń partiiamyzdyń sailaýaldy baǵdarlamasyn iske asyrý, sondai-aq Memleket basshysynyń depýtattar aldyna qoiǵan mindetterin oryndaý jónindegi jumysyn jandandyrý qajet, osyny eskere otyryp, Májilistiń sailanǵan depýtattary arasynan partiianyń jańa kóshbasshysy bolýy tiis dep sanaimyn», - dedi Áli Bektaev. Al ózi QR Parlamenti Senatyndaǵy jumysyna negizgi kóńil bóletinin jetkizdi.
Partiianyń jańa tóraǵasy bolyp QR Parlamenti Májilisiniń depýtaty Serik Egizbaev sailandy.
Serik Egizbaev 1963 jyly Batys Qazaqstan oblysynda dúniege kelgen, aýyl sharýashylyǵy salasynda jáne memlekettik basqarý organdarynda praktikalyq tájiribesi bar.
«Aýyl» partiiasy biylǵy sailaý qorytyndysy boiynsha Parlament Májilisinde 8 depýtattyq mandatqa ie bolǵan eldegi eń iri saiasi kúshteriniń biri ekendigin atap ótken jón.
