Nazarbaev ziiatkerlik mektepterinde (NIS) jumys isteitin sheteldik muǵalimderdiń jalaqysy qazaqstandyq muǵalimderdiń eńbekaqysynan shamamen 4,5 ese joǵary. Bul týraly Qazaqstannyń Joǵary aýditorlyq palatasy jariialaǵan memlekettik biýdjettiń oryndalýyna júrgizilgen aýditte aityldy, dep habarlaidy Dalanews.kz.
«2023 jyly jergilikti ustazdardyń ortasha jalaqysy 508 100 teńgeni (shamamen 934 dollar) qurasa, shetelden kelgen oqytýshylar 2 281 500 teńge (shamamen 4 195 dollar) jalaqy alǵan», – delingen aýditorlyq palata esebinde.
Buǵan qosa, aýdit nátijesi boiynsha, NIS sheteldik ustazdarǵa turǵyn úi men ushaq bileti sekildi qosymsha shyǵyndardy da ótep bergen.
Sońǵy bes jyl ishinde Nazarbaev ziiatkerlik mektepteri 643 sheteldik muǵalimdi jumysqa qabyldap, olardyń jalaqysyna 31,2 million dollardan astam qarajat jumsaǵan. Degenmen, aýditorlardyń aitýynsha, sheteldik mamandardyń bilim sapasyn arttyrýǵa naqty qandai úles qosqany belgisiz.
Muǵalimderdi qabyldaý protsesinde kemshilik kóp
Sonymen qatar, aýdit barysynda 254 muǵalimniń eshqandai konkýrssyz, iaǵni ashyq irikteýden ótpei-aq jumysqa qabyldanǵany anyqtalǵan. Saldarynan jumysqa alynǵan oqytýshylardyń 20,4 paiyzy biliktilik talaptaryna sai kelmegen.
Budan bólek, mekteptiń aqyly negizde oqityn oqýshylardy qabyldaý erejelerin de saqtamai, emtihandy formaldy túrde ótkizgeni belgili boldy.
«Nátijesinde aqyly negizde oqityn balalardyń bilim deńgeii grant iegerlerimen salystyrǵanda edáýir tómen. Bul jalpy bilim sapasyna teris áser etip otyr», – deidi aýditorlar.
Qarjylai qoldaý máseleleri
Joǵary aýditorlyq palatanyń málimetine sáikes, memleket ata-analarǵa túsetin qarjylyq júktemeni azaitý úshin biýdjetten 162 million teńge (298 myń dollar) bólgen. Biraq buǵan qaramastan, Nazarbaev ziiatkerlik mektepterinde oqý aqysy tómendemegen.
Aita ketý kerek, Qazaqstan úkimeti eldegi joǵary bilimge qoljetimdilikti arttyrý úshin paiyzsyz stýdenttik nesie berý bastamasyn iske asyrýdy josparlap otyr. Bul shara elde biliktiligi joǵary mamandar sanyn arttyrýǵa baǵyttalǵan.
