Atyraýda tórt adamnan turatyn otbasynyń ólimine qatysty negizgi sot talqylaýy bastaldy. Aiyptalýshy retinde sot aldyna qaza tapqan otbasynyń kúieý balasy Sultan Sársemáliev keldi, dep habarlaidy Tengrinews.kz.
Búgin prokýrorlar oǵan aiyp taqty. Sot otyrysynda prokýror is boiynsha epizodtardyń birin – sottalýshynyń áieliniń aǵasy Naýryz Muqanǵalievtiń ólimine qatysty derekterdi jariialady.
Aita keteiik, bir otbasynyń músheleri ár ýaqytta óltirilgen. Naýryz Muqanǵaliev bir jyldan astam ýaqyt buryn Atyraý mańyndaǵy Geolog shaǵynaýdanynda jalǵa alynǵan úide qaza tapqan.
Tergeý málimetinshe, Naýryz Muqanǵalievtiń denesi uzaq ýaqyt boiy jer astynda jatqan. Ol qylmys jasalǵannan keiin shamamen 6-8 ai ótken soń ǵana tabylǵan.
Is materialdaryna sáikes, kisi óltirgennen keiin Sultan Sársemáliev qylmystyń izin jasyrýǵa tyrysqan. Ol marqumnyń denesin ózi jalǵa alǵan Geolog kentindegi úidiń aýlasyna kómip tastaǵan.
Tergeý anyqtaǵandai, sottalýshy aldymen shuńqyr qazyp, keiin máiitti sol jerge aparyp kómgen. Sondai-aq ol jerlengen oryndy muqiiat jasyrýǵa tyrysqan.
"Qylmys jasaǵannan keiin Sársemáliev kezdeisoq kýágerlerge kózge túspeý úshin qarańǵy túskenin kútken. Shamamen tún ortasynda ol kúrek alyp, úiiniń aýlasyndaǵy ońtústik bólikten shuńqyr qaza bastaǵan. Máiitti kómý úshin qazylǵan oryn ǵimarat qabyrǵasynyń irgetasynan nebári 60 santimetr jerde bolǵan. Túngi saǵat úshter shamasynda kúdikti tereńdigi shamamen bir metr, eni 80 santimetr bolatyn qabir qazyp bitirgen", – dedi prokýror sot otyrysynda.
Qylmystan keiin Sársemáliev marqumnyń jeke zattaryn qarap shyqqan. Ol onyń jeke kýáligin, bank kartasyn, uialy telefonyn jáne qolma-qol aqshasyn alyp ketken. Iz jasyrý maqsatynda úidiń ishin retke keltirip, bolǵan oqiǵaǵa qatysy bolýy múmkin zattardan qutylǵan.
“Sot-meditsinalyq saraptamanyń qorytyndysyna sáikes, Naýryz Muqanǵalievtiń denesi jer astynda 6 aidan 8 aiǵa deiin jatqan. Osy ýaqyt ishinde máiit tinderinde aiqyn shirý ózgeristeri bolǵan. Bul bastapqy zertteý kezinde ólimniń naqty sebebin anyqtaýdy edáýir qiyndatqan”, – dedi prokýror aiyptaý aktisin jariialaý barysynda.
Prokýrordyń aitýynsha, qylmystyń izin tolyq jasyrý úshin Sársemáliev úidiń ishin muqiiat jýyp, qan izderin ketirgen. Qylmys quraly bolǵan asúi pyshaǵyn, sondai-aq Naýryz Muqanǵalievtiń denesi oralǵan kilemdi úidiń qarsy betindegi qoqys alańyna aparyp, tolyq órtep jibergen.
