Atyraý oblysynda úsh jasar egiz balalarǵa qatysty jasalǵan bolýy múmkin jynystyq zorlyq faktisi boiynsha qozǵalǵan qylmystyq is jetinshi ret toqtatyldy. Úsh jylǵa jýyq ýaqytqa sozylǵan tergeý áli kúnge deiin sotqa jetken joq, dep habarlaidy dalanews.kz.
Halyqstan málimetinshe, oqiǵa 2023 jyldyń qarasha aiynda bastalǵan. Balalardyń anasy politsiiaǵa aryzdanyp, búldirshinderge zorlyq kórsetti degen kúdikpen olardyń týǵan ákesin kórsetken.
Anasynyń aitýynsha, balalardy tekserý kezinde túsirilgen beinejazbalar bar. Atyraýdaǵy jalǵyz balalar proktology Valerii Krivchach ul men qyzdy qarap, ekeýinde de jynystyq zorlyq belgileri bar degen qorytyndy jasaǵan.
Keiin psihologiialyq-psihiatriialyq saraptama da balalardyń aitqandary shynaiy psihologiialyq jaraqatqa sáikes keletinin, olardyń sózderinde oidan shyǵarylǵan belgiler joq ekenin kórsetken.
Soǵan qaramastan, tergeý barysynda qylmystyq is birneshe márte toqtatylyp, qaita qozǵalǵan. Úsh jyl ishinde mundai sheshim jeti ret qabyldanǵan.
Jábirlenýshi taraptyń aitýynsha, alǵashqy meditsinalyq tekserýdi júrgizgen balalar proktology keiingi komissiialyq saraptamalarǵa belgisiz sebeptermen qatystyrylmaǵan. Saraptamalardy negizinen balalar hirýrgteri júrgizgen. Alaida advokattyń sózinshe, hirýrgterdiń ózderi mundai jaǵdailarǵa túpkilikti baǵa berý balalar proktologynyń quzyretine kiretinin kórsetken.
Is aiasynda barlyǵy 11 saraptama taǵaiyndalǵan. Biraq balalardy kózbe-kóz tek eki ret teksergen: alǵash ret 2023 jyly Atyraýda, keiin bir jyl segiz ai ótken soń, 2025 jyldyń shildesinde Almatyda.
Almatydaǵy komissiia quramyndaǵy hirýrgter anyqtalǵan ózgeristerdiń zorlyqtan emes, sozylmaly ish qatý jáne basqa da jaraqatqa qatysy joq sebepterden týyndaýy múmkin degen qorytyndyǵa kelgen. Al qalǵan toǵyz saraptama balalardy qaita qaramai, tek meditsinalyq qujattar negizinde júrgizilgen.
Keiin is materialdarynda Atyraý men Almatyda komissiia quramyna balalar proktologyn tartý múmkin bolmaǵany kórsetilgen. Alaida jábirlenýshi tarap mundai mamandardyń eki qalada da bar ekenin alǵa tartady.
Tergeý barysynda balalardyń ákesi bir kezeńde resmi túrde kúdikti dep tanylǵan. Alaida keiin komissiialyq saraptamalardyń qorytyndysyna súiene otyryp, is qylmystyq quqyq buzýshylyq quramy joq degen negizben qaita toqtatylǵan. Prokýratýra jábirlenýshi taraptyń shaǵymdaryn qarap, bul sheshimdi kúshinde qaldyrǵan.
Sonymen qatar, anasynyń málimdeýinshe, kúdikti Atyraý oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń sýdialarynyń birine týystyq jaǵynan jaqyn. Áiel bul bailanysty rastaityn úilený toiynda túsirilgen fotosýretti usynǵan.
Jaqynda áiel qylmystyq istiń jetinshi ret toqtatylǵanyn bilgen. Soǵan qaramastan, ol kúresti toqtatpaitynyn aityp otyr.
"Bul qaýlynyń kúshin taǵy da joiýǵa tyrysyp jatyrmyn. Balalaryma qatysty is mindetti túrde sotqa jetýi kerek. Kináli adam zań aldynda jaýap bermeiinshe, men toqtamaimyn. Bul - ádildik úshin ǵana emes, basqa balalardyń qaýipsizdigi úshin de mańyzdy", – deidi ol.
