Bolat Aqsholaqov Atyraý oblysynyń ákimi qyzmetine taǵaiyndaldy. Ol bul laýazymnan bosatylǵan Serik Shápkenovtiń ornyna keldi, dep habarlaidy dalanews.kz.
"Memleket basshysynyń Jarlyǵymen Bolat Oraluly Aqsholaqov Atyraý oblysynyń ákimi laýazymyna taǵaiyndaldy", – delingen Aqorda habarlamasynda.
Bolat Aqsholaqov kim?
Bolat Aqsholaqov 1971 jyly Atyraý qalasynda dúniege kelgen. Qazaq memlekettik basqarý akademiiasyn ekonomist mamandyǵy boiynsha támamdap, keiin munai-gaz ónerkásibi salasynda kásibi bilimin jetildirgen.
Ol eńbek jolyn 1990 jyldardyń basynda bank salasynda bastady. Keiin munai-gaz sektoryndaǵy birqatar iri kompaniiada basshylyq qyzmetter atqardy.
Ár jyldary "QazMunaiGaz" ulttyq kompaniiasynda, "Samuryq-Qazyna" ulttyq ál-aýqat qorynda jáne Energetika ministrliginde jaýapty laýazymdarda eńbek etti.
Bolat Aqsholaqov 2022 jylǵy qańtarda Qazaqstannyń energetika ministri bolyp taǵaiyndaldy. 2023 jyldan 2025 jylǵy aqpanǵa deiin Memleket basshysynyń keńesshisi qyzmetin atqardy.
2025 jylǵy aqpannan bastap KAZENERGY qaýymdastyǵyn basqardy. Keiin Qazaqstan investorlary qaýymdastyǵynyń basshylyǵyna kelgeni habarlanǵan.
Memlekettik jáne munai-gaz salasyndaǵy eńbegi úshin Bolat Aqsholaqov "Qurmet" ordenimen marapattalǵan.
Ákesi belgili geolog bolǵan
Jańa ákimniń ákesi Oral Aqsholaqov – Qazaqstannyń munai-gaz salasyna úles qosqan belgili geolog ári ǵalym.
Ol elimizdegi iri munai jáne gaz ken oryndaryn zertteý men igerý jumystaryna qatysqan. Oral Aqsholaqov 2023 jyly dúnieden ótti.
Keibir buqaralyq aqparat quraldarynyń málimetinshe, Bolat Aqsholaqovtyń anasy Shyǵys Qazaqstan óńirine belgili Chaijýnýsovtar áýlinen shyqqan.
Osylaisha, munai-gaz salasynda kóp jyldyq tájiribe jinaǵan Bolat Aqsholaqov Qazaqstannyń negizgi munai óndirýshi óńirleriniń biri sanalatyn Atyraý oblysyn basqaratyn boldy.
