Atyraýlyqtar ákimin joǵaltyp, ony izdep jatyr
«Men 1920 jylǵy Landysheva Katerina Ivanovnamyn. Tas jol degen atymen joq Atyraý qalasy, Balyqshy aýdany, Vodnikov aýylynyń turǵynymyn. Qalaǵa jańa ákim taǵaiyndaldy dep estigenmin, biraq ol áli tóbesin bir kórsetpegen soń, alańdap, politsiiaǵa habarlasýǵa májbúrmin. Qazir mazasyz ýaqyt, únemi bizde qaýiptiń qandai da bir deńgeii jariialanady. Mundaida qalai tynysh uiyqtaisyz, eger qalada ákim bolmasa. Negizi, ol bar, biraq túrin kórgenimiz joq. Ony halyqtan neǵyp tyǵyp otyr?
Jazdyń sońynda qala úlken qoqys alańyna ainaldy, al ákim bolsa, áli joq. Endi kúz kele jatyr, al jol bolsa áli jasalmaǵan, ákim joq. Mektepterdiń daiyn-daiyn emestigi de túsiniksiz, taǵy da oqýlyqtar jetispei jatyr, al ákim joq… Bizdiń ákimdi taýyp berińizdershi!
Negizi, ol shaitanarba úirenetin kýrsqa baryp júr degen sybys bar. Ákimderge arnalǵan. Oǵan beker ter tókpesin deńizdershi. Óitkeni bizdiń qalada velosipedke arnalǵan jol joq. Bireýi bar, áýejaiǵa aparatyn, onda da ony Pýtinge kórsetý úshin salǵan. Ákimge izdeý jariialańyzdarshy, ótinemin! Jylýmen qamtý merzimi taqaǵanda qalany tastap ketkeni, negizi bolmady» dep jazylady ázil-qaljyń aralas Atyraý qalasy ákimine salynǵan izdeý hatta.
Áleýmettik jelidegi bul jazbaǵa qatysty oblystyq ákimdiktiń baspasóz qyzmeti jaýap berdi dep habarlady QazAqparat.
«Atyraý qalasynyń ákimi Serik Shapkenov qalanyń jaǵdaiymen tanysyp jatyr, shaǵynaýdandar men qala syrtyndaǵy eldi-mekenderdi aralap, kórip júr. Ol qyzmetine kirisken jarty ai ishinde birneshe ret qala turǵyndaryn qabyldap, qaladaǵy resmi sharalarǵa da qatysty. Sońǵy ret qala basshysy ustazdarǵa arnalǵan tamyz keńesine qatysqan bolatyn.
Taiaý kúnderi Serik Shapkenov Atyraý oblysynyń ákimi Nurlan Noǵaevpen birge muǵalimderdiń oblystyq tamyz konferentsiiasyna qatyspaq. Atyraý ákiminiń barlyq BAQ ókilderine tildesý úshin árdaiym esigi ashyq» — deidi oblystyq ákimdiktiń baspasóz qyzmeti.
Eske sala ketelik, Serik Shapkenov Atyraý qalasyna 14-shildede ákim bolyp taǵaiyndalǵan bolatyn.
Derekkózi: kaz.365info.kz
