Aimaq basshysy Mahambet Dosmuhambetov el Táýelsizdiginiń halqymyz úshin asa mańyzǵa ie ekenin jetkizdi.
– Halqymyz úshin azattyqtan asqan qundylyq joq. San ǵasyrdan saryla jetken sanadaǵy murat jańa dáýirde jasampaz qýatqa ainaldy. Tuńǵysh Prezidentimiz aitqandai: «Táýelsizdik dáýiri degenimiz – ulttyń buryn ótýi múmkin emesteĭ kórinetin shyńyraýdyń shetindegi taýdyń qaterli soqpaǵymen júrgenmen birdeĭ qubylys. Alaĭda biz ony da baǵyndyra aldyq». Elbasy bastaǵan býyn álemge jáne bolashaq urpaqqa Táýelsiz Qazaqstan atty jasampazdyqtyń uly jemisin usyndy, – dedi oblys ákimi.
Sonymen qatar, Mahambet Dosmuhambetov jalpy elimizben birge óńirdiń táýelsizdik jyldaryndaǵy ósip-órkendeýine toqtalyp ótti.
– Táýelsizdiktiń arqasynda Atyraý oblysy da buryn-sońdy bolmaǵan jetistiktirge qol jetkizdi. Halyqtyń turmys sapasyn jaqsartý eń basty mindetimiz boldy. Osy jyldarda óńirdegi jumyssyzdyq deńgeii 15,5%-dan 4,9%-ǵa deiin tómendedi. 1994 jyly óńirde belsendi jumys kúshi 175 myń adam bolsa, biyl 334 myńǵa deiin jetti, – degen M.Dosmuhambetov oblysta turǵyndardyń tabiǵi gazben qamtylýy 12 protsentten 99,7 protsentke deiin, al, ortalyqtandyrylǵan sýmen qamtý kórsetkishi 35 protsentten 99 protsentke deiin artqanyn atap ótti.
Sondai-aq, óńirde 100 myńnan astam otbasy baspanaly bolyp, 12 million sharshy metr turǵyn úi paidalanýǵa berilgeni aityldy. Sonymen qatar, bilim, densaýlyq, sport salalarynda da jetistikter aitarlyqtai óskenin jetkizdi.
«Egemendik alýymyzben elimizdiń altyn dáýiri bastaldy. Osy kezeń ishinde biz talai tarihi belesti baǵyndyrdyq. Buǵan ár aimaqtyń qosqan úlesi zor. Sonyń ishinde Atyraý oblysynyń orny bólek ekenin maqtanyshpen aitýymyz kerek. Muny Elbasy Nursultan Nazarbaevtyń: «Atyraý Qazaqstannyń óz táýelsizdigin alǵannan beri qalai damyǵanynyń simvoly bolyp sanalady» degen sózi qýattai túsedi.
Sondai-aq, Qazaqstannyń eńbek sińirgen qairatkeri, jazýshy, kompozitor, «Atyraý oblysynyń Qurmetti azamaty» Ilia Jaqanov pen táýelsizdik qurdastary óz tilekterin bildirdi.
Óz kezeginde, Ulybritaniiadan bilim alǵan, qazirgi sátte NKOK kompaniiasynda injener bolyp eńbek etenin Berik Ýap óziniń osy salaǵa kelýin tarihi oqiǵamen bailanystyrdy. Ol 2000 jyly Elbasy Nursultan Nazarbaevtyń Qashaǵan ken ornyn ashqanda, ózine bata berip, yrymdap, qazaq munaiymen betin sipaǵan jeti jasar sátin eske aldy.
Sonymen qatar, merekelik sharada oblysymyzdyń kórkeiýi men ekonomikasynyń ósýine ózindik úlesin qosyp júrgen óńirdiń bir top azamattary oblys ákiminiń Alǵys hatymen marapattaldy.
Saltanatty sharada arnaiy daiyndalǵan film kelýshiler nazaryna usynylyp, sońy kontserttik baǵdarlamaǵa ulasty.
