Atyraý oblysynda politsiia mototsikl tizgindegen jasóspirimdi basyp ketken oqiǵaǵa qatysty sot úkimi shyqty, - dep habarlaidy Dalanews.kz.
Atyraý oblysynyń Qyzylqoǵa aýdandyq sotynda abaisyzda adam ólimine ákep soqqan jol qozǵalysy erejelerin buzǵany úshin aiyptalǵanǵa qatysty qylmystyq is qaraldy. (QK-tiń 345-babynyń 3-bóligi.)
"Qyzylqoǵa aýdany Politsiia bólimi patrýldik politsiia tobynyń inspektory qyzmettik avtokólikpen áriptesi ekeýi patrýldik qyzmetterin atqarý barysynda jasy kámeletke tolmaǵannyń basqarýyndaǵy mototsikldiń artynda jasy kámeletke tolmaǵan eki jolaýshy bar kúide júrgenin anyqtap, dybys belgisi arqyly toqtaýdy talap etken. Alaida jasy kámeletke tolmaǵan júrgizýshi politsiia qyzmetkeriniń zańdy talaptaryna baǵynbai, qozǵalysyn jalǵastyrǵan.
Sottalýshy ony qýdalap kele jatyrǵanda, jasy kámeletke tolmaǵan Jol júrisi qaǵidalaryn buzýshy qara jerge shyǵyp ketip, mototsikldiń basqarý júiesin igere almai, jerge qulaǵan. Sol kezde inspektor qaýipsizdik sharalaryn qoldanbai, Jol júrisi qaǵidalaryn óreskel buzyp, jasy kámeletke tolmaǵandy qaǵyp ketken, nátijesinde ol oqiǵa ornynda esin jimastan qaza bolǵan", - dep jazylǵan sot habarlamasynda.
Prokýror sottalýshyny 2 jyl 6 ai merzimge bas bostandyǵynan aiyrýdy surady. Jábirlenýshi ókili zańǵa sai jaza qoldanýdy surady. Sottalýshy óz kinásin moiyndady.
Sottalýshynyń shyn júrekten ókinýi, asyraýynda jasy kámeletke tolmaǵan balalarynyń bolýy, buryn sottalmaǵany - jaza men qylmystyq jaýapkershilikti jeńildetetin mán-jailar retinde tanyldy. Aýyrlatatyn mán-jailar anyqtalmady.
Sottalýshy QK-tiń 345-babynyń 3-bóligimen kináli dep tanylyp, oǵan 5 jyl merzimge kólik quraldaryn basqarý quqyǵynan aiyra otyryp, 2 jyl merzimge bas bostandyǵynan aiyrý jazasy taǵaiyndaldy. Azamattyq talap ishinara qanaǵattandyryldy. Sot úkimi zańdy kúshine engen joq.
Aita keteiik, oqiǵa biyl sáýirde bolǵan edi.
