Bul jóninde Orda.kz saıty habarlady.
Saıt Hamenovanyń sotqa tergeý ızolátorynan jetkizilgenin jazyp, sýretin de jarıalady. Sýdıa Jamaǵalı Táshimov odan "aıyptaý aktisin aldyńyz ba" dep suraǵanda "almadym" dep jaýap bergen. Keıin prokýror aıyptaý aktisin tapsyrǵan.
Atyraý oblysy ákiminiń burynǵy orynbasary Baqytgúl Hamenovanyń ustalǵany byltyr jeltoqsanda belgili bolǵan.
Sheneýniktiń ústinen "Edáýir kólemde para alý" (Qylmystyń kodekstiń 366-baby 2-bólimi) baby boıynsha qylmystyq is qozǵalǵan.
Ol 4,5 mln teńge kóleminde "para alǵany" jóninde kúdikke ilingen. Bul Atyraýda ornatylýy tıis Abaı eskertkishine bólingen tender qarajatynan "otkat" dep aıtylady.
Bastapqyda ol úıqamaqqa alynyp, keıin úıqamaqtan tergeý ızolátoryna aýystyryldy. Osy is aıasynda Aqylbek Rysqalıev te "para aldy" degen kúdikke ilingen. Al "Balqytý" JSHS dırektory Ómirtaı Adamov "para berdi" dep aıyptalyp otyr.
Orda.kz jazýynsha, sársenbi kúni Hamenovany qoldaýǵa 30 shaqty adam kelgen. Biraq keıbiri zalǵa syımaǵandyqtan syrtta kútýge májbúr bolǵan. Sýdıa sot otyrysyn 11 tamyzǵa aýystyrǵan.
Baqytgúl Hamenova 2020 jyly naýryzda Atyraý oblysy ákiminiń orynbasary bolyp taǵaıyndalǵan. Oǵan deıin 6-shaqyrylymdaǵy májilis depýtaty boldy.
2016 jyly depýtat bolyp júrgen kezde ol astanany "Elbasy" dep ataý týraly usynys aıtqan.
Buǵan deıin Atyraý oblysy ákiminiń taǵy eki orynbasary "para alý" boıynsha kúdikke ilingen.
