بۇل جٶنٸندە Orda.kz سايتى حابارلادى.
سايت حامەنوۆانىڭ سوتقا تەرگەۋ يزولياتورىنان جەتكٸزٸلگەنٸن جازىپ, سۋرەتٸن دە جارييالادى. سۋديا جاماعالي تەشٸموۆ ودان "ايىپتاۋ اكتٸسٸن الدىڭىز با" دەپ سۇراعاندا "المادىم" دەپ جاۋاپ بەرگەن. كەيٸن پروكۋرور ايىپتاۋ اكتٸسٸن تاپسىرعان.
اتىراۋ وبلىسى ەكٸمٸنٸڭ بۇرىنعى ورىنباسارى باقىتگٷل حامەنوۆانىڭ ۇستالعانى بىلتىر جەلتوقساندا بەلگٸلٸ بولعان.
شەنەۋنٸكتٸڭ ٷستٸنەن "ەدەۋٸر كٶلەمدە پارا الۋ" (قىلمىستىڭ كودەكستٸڭ 366-بابى 2-بٶلٸمٸ) بابى بويىنشا قىلمىستىق ٸس قوزعالعان.
ول 4,5 ملن تەڭگە كٶلەمٸندە "پارا العانى" جٶنٸندە كٷدٸككە ٸلٸنگەن. بۇل اتىراۋدا ورناتىلۋى تيٸس اباي ەسكەرتكٸشٸنە بٶلٸنگەن تەندەر قاراجاتىنان "وتكات" دەپ ايتىلادى.
باستاپقىدا ول ٷيقاماققا الىنىپ, كەيٸن ٷيقاماقتان تەرگەۋ يزولياتورىنا اۋىستىرىلدى. وسى ٸس اياسىندا اقىلبەك رىسقاليەۆ تە "پارا الدى" دەگەن كٷدٸككە ٸلٸنگەن. ال "بالقىتۋ" جشس ديرەكتورى ٶمٸرتاي اداموۆ "پارا بەردٸ" دەپ ايىپتالىپ وتىر.
Orda.kz جازۋىنشا, سەرسەنبٸ كٷنٸ حامەنوۆانى قولداۋعا 30 شاقتى ادام كەلگەن. بٸراق كەيبٸرٸ زالعا سىيماعاندىقتان سىرتتا كٷتۋگە مەجبٷر بولعان. سۋديا سوت وتىرىسىن 11 تامىزعا اۋىستىرعان.
باقىتگٷل حامەنوۆا 2020 جىلى ناۋرىزدا اتىراۋ وبلىسى ەكٸمٸنٸڭ ورىنباسارى بولىپ تاعايىندالعان. وعان دەيٸن 6-شاقىرىلىمداعى مەجٸلٸس دەپۋتاتى بولدى.
2016 جىلى دەپۋتات بولىپ جٷرگەن كەزدە ول استانانى "ەلباسى" دەپ اتاۋ تۋرالى ۇسىنىس ايتقان.
بۇعان دەيٸن اتىراۋ وبلىسى ەكٸمٸنٸڭ تاعى ەكٸ ورىنباسارى "پارا الۋ" بويىنشا كٷدٸككە ٸلٸنگەن.
