Atyraýda NCOC qyzmetkeri Bibigúl Shpanovanyń ólimine qatysty sot úkimi shyqty, - dep habarlaidy Dalanews.kz.
Atyraý oblysynyń qylmystyq ister jónindegi mamandandyrylǵan aýdanaralyq sotynda kúdiktige qatysty alaiaqtyq, zorlaý jáne júkti áieldi basqa qylmystardy jasyrý maqsatynda asa qatygezdikpen óltirý, sondai-aq, urlyq jasaý jáne kólikti zańsyz iemdený boiynsha qylmystyq is qaraldy.
Sot málimetinshe, 2022 jyly jábirlenýshi Atyraý qalasynda páter satyp alyp, santehnik mamanymen tanysqan. Ol jóndeý jumystaryn talqylap, senimge kirip, jábirlenýshiniń turaq ornyn satyp alý jospary baryn bilgen. Ol jábirlenýshini uiym qyzmetkerleri arqyly turaq ornyn jeńildikpen satyp alýǵa kómektesetinine sendirip, odan 400 myń teńge aldyn-ala tólem alǵan. Keiin jábirlenýshi kúdiktige kelisim týraly birneshe ret esine salǵan.
Bir jyldan keiin ol taǵy da santehnik mamanyna qońyraý shalyp, turaq orny týraly esine salyp, másele sheshilmegen jaǵdaida shaǵym túsiretinin eskertken. Óziniń júkti ekenin, odan ári kútý múmkin emes ekenin de aitqan. Osydan keiin santehnik mamany aryzdy rásimdeý syltaýymen oǵan mas kúide kelgen.
"Alaiaqtyqty jasyrý úshin ol maska taǵyp, pyshaqpen qarýlanyp, jábirlenýshini zorlap, asa qatygezdikpen óltirgen. Keiin ol páterdi tintip, seifti ashyp, qomaqty aqsha men zergerlik buiymdardy urlap, kólik pen uialy telefondy iemdengen. Jalpy materialdyq shyǵyn 13 mln teńgeden asqan", - dep jazylǵan habarlamada.
Sottalýshynyń kinási dáleldermen rastalǵan. Sottalýshy barlyq aiyp boiynsha kináli dep tanyldy.
"Ol ómir boiyna bas bostandyǵynan aiyrylý jazasyna sottaldy. Jábirlenýshiniń paidasyna materialdyq jáne moraldyq zalal óndirildi", - dep jazylǵan habarlamada.
Eske salaiyq, biyl 29 sáýirde Atyraýda óz úiinen 45 jastaǵy Bibigúl Shpanova óli tabylǵan edi.
