اتىراۋدا NCOC قىزمەتكەرى بيبىگۇل شپانوۆانىڭ ولىمىنە قاتىستى سوت ۇكىمى شىقتى، - دەپ حابارلايدى Dalanews.kz.
اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا كۇدىكتىگە قاتىستى الاياقتىق، زورلاۋ جانە جۇكتى ايەلدى باسقا قىلمىستاردى جاسىرۋ ماقساتىندا اسا قاتىگەزدىكپەن ءولتىرۋ، سونداي-اق، ۇرلىق جاساۋ جانە كولىكتى زاڭسىز يەمدەنۋ بويىنشا قىلمىستىق ءىس قارالدى.
سوت مالىمەتىنشە، 2022 جىلى جابىرلەنۋشى اتىراۋ قالاسىندا پاتەر ساتىپ الىپ، سانتەحنيك مامانىمەن تانىسقان. ول جوندەۋ جۇمىستارىن تالقىلاپ، سەنىمگە كىرىپ، جابىرلەنۋشىنىڭ تۇراق ورنىن ساتىپ الۋ جوسپارى بارىن بىلگەن. ول جابىرلەنۋشىنى ۇيىم قىزمەتكەرلەرى ارقىلى تۇراق ورنىن جەڭىلدىكپەن ساتىپ الۋعا كومەكتەسەتىنىنە سەندىرىپ، ودان 400 مىڭ تەڭگە الدىن-الا تولەم العان. كەيىن جابىرلەنۋشى كۇدىكتىگە كەلىسىم تۋرالى بىرنەشە رەت ەسىنە سالعان.
ءبىر جىلدان كەيىن ول تاعى دا سانتەحنيك مامانىنا قوڭىراۋ شالىپ، تۇراق ورنى تۋرالى ەسىنە سالىپ، ماسەلە شەشىلمەگەن جاعدايدا شاعىم تۇسىرەتىنىن ەسكەرتكەن. ءوزىنىڭ جۇكتى ەكەنىن، ودان ءارى كۇتۋ مۇمكىن ەمەس ەكەنىن دە ايتقان. وسىدان كەيىن سانتەحنيك مامانى ارىزدى راسىمدەۋ سىلتاۋىمەن وعان ماس كۇيدە كەلگەن.
"الاياقتىقتى جاسىرۋ ءۇشىن ول ماسكا تاعىپ، پىشاقپەن قارۋلانىپ، جابىرلەنۋشىنى زورلاپ، اسا قاتىگەزدىكپەن ولتىرگەن. كەيىن ول پاتەردى ءتىنتىپ، سەيفتى اشىپ، قوماقتى اقشا مەن زەرگەرلىك بۇيىمداردى ۇرلاپ، كولىك پەن ۇيالى تەلەفوندى يەمدەنگەن. جالپى ماتەريالدىق شىعىن 13 ملن تەڭگەدەن اسقان"، - دەپ جازىلعان حابارلامادا.
سوتتالۋشىنىڭ كىناسى دالەلدەرمەن راستالعان. سوتتالۋشى بارلىق ايىپ بويىنشا كىنالى دەپ تانىلدى.
"ول ءومىر بويىنا باس بوستاندىعىنان ايىرىلۋ جازاسىنا سوتتالدى. جابىرلەنۋشىنىڭ پايداسىنا ماتەريالدىق جانە مورالدىق زالال ءوندىرىلدى"، - دەپ جازىلعان حابارلامادا.
ەسكە سالايىق، بيىل 29 ساۋىردە اتىراۋدا ءوز ۇيىنەن 45 جاستاعى بيبىگۇل شپانوۆا ءولى تابىلعان ەدى.
