Atyraýda turǵyn úilerdiń birinen er adamnyń máiiti tabyldy. Aldyn ala málimetke sáikes, marqumnyń denesi páterde shamamen úsh apta boiy jatqan, dep habarlaidy Dalanews.kz.
Aqjaiyq usynǵan málimetke sáikes, oqiǵa Bereke shaǵynaýdanyndaǵy №24 úide bolǵan. Kórshilerdiń sózinshe, biraz ýaqyttan beri podezge ótkir jaǵymsyz iis taraǵan jáne ol áli kúnge deiin tolyq joiylmaǵan.
"Iis búkil podezge sińip ketken. Ózimiz qarajat shyǵaryp, tazalyq qyzmetkerlerin shaqyrdyq. Hlor men túrli tazartqysh quraldardy qoldandyq, biraq nátije mardymsyz. Bul isti kásibi mamandar atqarýy kerek", — deidi úi turǵyndarynyń biri Aqjaiyq agenttigine.
Marqumnyń ómir joly men jaǵdaiy da belgili boldy. Otbasy tanystarynyń aitýynsha, er adam bala kezinen jetimder úiinde tárbielengen. Onyń eki ápkesi bar: biri aýdanda, ekinshisi Atyraý qalasynda turady. Memlekettik baǵdarlama aiasynda baspana alǵan soń, ol jeke ózi ómir súrgenimen, týystarymen bailanysyn úzbegen. Alaida sońǵy ýaqytta ony eshkim kórmegen, jaqyndary ony basqa qalada jumys istep júr dep oilaǵan.
Sonymen qatar marqumnyń ekinshi toptaǵy múgedek ekeni aitylyp otyr. Densaýlyǵyna bailanysty turaqty jumyspen qamtylý qiyn bolǵanymen, óz betinshe tirshilik etip, ómirin jaqsartýǵa talpynǵan. Úilenbegen, minezi ashyq ári jany jumsaq adam bolǵan.
"Ápkesi ony izdei bastaǵanda ǵana qaiǵyly jaǵdaidyń beti ashyldy. Sol kezde týystary dereý áreket etti. Ókinishke qarai, uzaq ýaqyt boiy bul jait eshkimge belgisiz qalǵan", — deidi marqumnyń tanystary.
Quzyrly organdar ázirge ólimniń naqty sebebin jariialaǵan joq. Al turǵyndardyń aitýynsha, páter men podezge tolyq sanitarlyq óńdeý júrgizý máselesi áli kúnge deiin sheshimin tappaǵan.
