6 qańtar kúni Atyraý oblysy Qyzylqoǵa aýdanyna qarasty Jangeldin aýylynda buǵan deiin iz-tússiz joǵalǵan otbasynyń eki múshesiniń máiiti tabyldy. Al qarasha aiynda olardyń qyzdarynyń birin kórshi aýdandaǵy janarmai quiý beketinde beinebaqylaý kameralary tirkegen, dep habarlaidy Dalanews.kz KTK arnasyna silteme jasap.
Politsiianyń málimetinshe, joǵalyp ketkenderdiń ekeýiniń denesi turǵyn úi aýlasyndaǵy qora mańynan tabylǵan. Aldyn ala boljam boiynsha, máiitter sol jerde shamamen eki ai boiy jatqan. Qaitys bolǵandardyń naqty kim ekeni ázirge resmi túrde jariialanǵan joq.
Aita keteiik, Jangeldin aýylynda zeinetker Maqsot Muqanǵaliev, onyń jubaiy Nasip Úteshqalieva jáne olardyń 35 jastaǵy qyzy Meiramgúl men 33 jastaǵy uly Naýryz ótken jyldyń qazan aiynan beri habar-osharsyz ketken bolatyn. Týystary olardyń joǵalǵany týraly politsiiaǵa 25 jeltoqsanda aryzdanǵan.
Aýyl turǵyndarynyń aitýynsha, otbasy eshqashan kúdik týdyrmaǵan. Olar mal sharýashylyǵymen kún kórip, kórshilerimen tatý turǵan.
Týystarynyń sózinshe, joǵalyp keter aldynda otbasynyń uly Naýryz WhatsApp arqyly habarlasyp, anasynyń syrqattanyp qalǵanyn aityp, úidegi maldy satýǵa usynys jasaǵan. Alaida ol tek mátindik habarlamalar jiberip, beine nemese daýys bailanysyna shyqpaǵan.
Sondai-aq tergeý barysynda otbasynyń taǵy bir qyzy 5 qarasha kúni taksimen aýyldan shyǵyp ketkeni anyqtalǵan. Ol keiin Inder aýdany aýmaǵyndaǵy janarmai quiý beketinde beinebaqylaý kameralaryna túsip qalǵan. Qazirgi tańda onyń shetelge, naqtyraq aitqanda Ózbekstanǵa ketkeni belgili.
Atyraý oblystyq Tótenshe jaǵdailar departamentiniń málimetinshe, izdeý jumystaryna politsiia, qutqarýshylar, súńgýirler jáne arnaiy tehnikalar tartylǵan. Qazirgi ýaqytta taǵy eki adamnyń taǵdyry belgisiz.
Atalǵan derek boiynsha qylmystyq is «Adam óltirý» baby boiynsha tirkelip, tergeý amaldary jalǵasyp jatyr.
