Atyraýda er adam shetel aýmaǵyndaǵy qarýly qaqtyǵysqa qatysqany úshin 5 jylǵa bas bostandyǵynan aiyryldy, dep habarlaidy Dalanews.kz.
"Atyraý qalasynyń №2 sotynda shetel memleketiniń aýmaǵyndaǵy áskeri qimyldarǵa qatysqany úshin (QR QK 172-baby) aiyptalǵan azamat S.-ǵa qatysty qylmystyq is qaraldy. Sot úkimimen oǵan 5 jylǵa bas bostandyǵynan aiyrý jazasy taǵaiyndaldy", – delingen Atyraý oblystyq sotynyń baspasóz qyzmeti taratqan resmi habarlamada.
Is materialdaryna sáikes, 2024 jyldyń naýryz aiynyń sońynda sottalýshy Máskeýge baryp, Resei Federatsiiasynyń ýákiletti organdarymen áskeri qyzmet týraly kelisimshart jasasqan. Qysqamerzimdi daiyndyqtan keiin, áskeri-medik retinde tank polkiniń quramynda Donetsk oblysyndaǵy urys qimyldaryna qatysqan.
2024 jyldyń jeltoqsanynda jarylǵysh qurylǵydan jaraqat alyp, gospitalge jetkizilgeni de belgili boldy.
Aiybyn moiyndady
Sot barysynda azamat óz kinásin tolyq moiyndap, shyn júrekten ókinetinin aityp, bas bostandyǵynan aiyrmaityn jaza taǵaiyndaýdy suraǵan.
Sot jazany jeńildetetin jaǵdailardy eskerdi: onyń kámeletke tolmaǵan balasy bar jáne shyn júrekten ókingeni nazarǵa alyndy. Alaida soǵan qaramastan, bas bostandyǵynan aiyrý jazasy qoldanyldy.
