Atyraýda áleýmettik jelide kópshiliktiń ashýyn týǵyzǵan Juldyz Saǵiden esimdi blogerdiń isi boiynsha sot aiaqtaldy. Ol birneshe er adamdy ar-namysyna tietin dóreki sózdermen qorlap, qoǵam narazylyǵyn týdyrǵan edi,- dep habarlaidy Dalanews.kz.
Áleýmettik jelige tarap ketken beinejazbada bloger túski ýaqytta dámhanada shái iship otyrǵan er adamdardy "áielge uqsaidy" dep kemsitip, olardyń syrtqy túrine, is-áreketine jiirkenish bildirgen.
"Munda saqaldy erkekter otyr, áiel siiaqty. Túrleri qandai jiirkenishti. Osylardyń áielderi qalai ǵana shydap júr eken? Túski mezgilde shái iship otyr, bular qashan jumys isteidi ózi?" – degen bolatyn Saǵiden.
Jeli qoldanýshylary blogerdiń bul áreketin adamdardy kemsitý, namysyn taptaý jáne jynystyq turǵydan alalaý dep aiyptady. Zańgerler tipti bul jaǵdaidy Qylmystyq kodekstiń 131-babymen ("Qorlaý") qaraýdy usynǵan. Sebebi beinejazba kópshilikke taraǵan.
Degenmen Atyraý turǵynynyń áreketi ákimshilik quqyq buzýshylyq dep baǵalanyp, ÁQBtK-niń 434-baby ("Usaq buzaqylyq") boiynsha qaraldy. Sot Saǵidenniń kinási dáleldengenin, blogerdiń ózi de kinásin tolyq moiyndap, istegen isine ókinip otyrǵanyn atap ótti.
Ákimshilik quqyq buzýshylyq boiynsha ádette 20 AEK (78 640 teńge) kóleminde aiyppul nemese bes kúnnen on bes kúnge deiin ákimshilik qamaýǵa alý qarastyrylǵan.
"Kináni moiyndaýy men istegen isine ókinýin eskerip, sot aiyppul kólemin 30%-ǵa azaitty. Nátijesinde bloger 55 048 teńge tóleýi tiis. Úkim ázirge zańdy kúshine engen joq", – dep habarlady Atyraý oblystyq sotynyń baspasóz qyzmeti.
Budan bólek, qoǵam belsendileri blogerdi jol qozǵalysy erejelerin buzǵany úshin de jaýapqa tartýdy talap etip otyr. Saǵiden avtokólik tizgininde video túsirgen kezde qaýipsizdik beldigin taqpai, bala ómirine qaýip tóndirdi degen pikirler de bar. Áleýmettik jeli qoldanýshylary qazir onyń menshigindegi avto-mektepke boikot jariialaýda.
Atyraýlyqtardyń kóbi blogerge kesilgen jaza qoǵamda týyndaǵan narazylyq deńgeiine sai emes dep esepteidi. Qarsy taraptyń aitýynsha, Saǵidenniń áreketi turmystyq dórekilik emes, qoǵamǵa qaýip tóndiretin agressiianyń bir kórinisi. Sondyqtan olar sot sheshimin qaita qaraýdy talap etýi múmkin.
