Atyraý oblysynyń Inderbor kentindegi ortalyq saiabaqqa dombyra monýmenti qoiyldy, dep habarlaidy Dalanews.kz.
Monýmentte “Abdolla dombyrasy” degen jazý bar.
Ulttyq dombyra kúni qarsańynda Inder aýdanynyń ortalyǵy – Inderbor kentinde dombyra monýmenti ashyldy. Aýdan ákimi Daryn Shamuratovtyń aitýynsha, altyn tústes metalldan quiylǵan monýmenttiń biiktigi – 7,5 metr. Bir ereksheligi dombyra monýmenti túngi mezgilde de jarqyrap turady.
“Dombyra – san ǵasyrdan beri ulttyń rýhyn biiktetken, talai urpaqtyń besigin terbep, erlik pen eldiktiń, adaldyq pen adamdyqtyń kúiin shertken ulttyq aspabymyz. Qazaqtyń dombyrasy arqyly ulttyq mádenietimizdi qalyptastyrǵan aqyn-jyraýlar, kúishi-dombyrashylar az emes. Dombyra monýmentin Atyraý topyraǵynan nár alyp, kúishilik, sazgerlik dástúrdi jalǵastyrǵan Qazaq SSR-iniń eńbek sińirgen mádeniet qyzmetkeri Abdolla Mýsaǵalievtiń esimimen ataýdy jón kórdik”, - deidi Daryn Shamuratov Inform.kz agenttigine bergen suqbatynda.
Ákimniń aitýynsha, dombyra monýmentin ashý ideiasynyń astarynda eki maqsat bar. Birinshisi – jas urpaqqa ulttyq qundylyqty nasihattaý. Al ekinshisi – kúishilik ónerdi keiingi býynǵa jetkizgen Abdolla Mýsaǵaliev sekildi óner sańlaqtarynyń el jadynda saqtalýyna yqpal etý.
“Abdolla dombyrasy” atalǵan monýmentke jergilikti ónerpazdar Ádil Esqaliev, Majan Esqaziev, Máýlet Qarasaev, Turǵanáli Úsenǵaliev, Qýanyshqali Qaraqulov, Únzira Ómirbaeva men Qanapiia Mahmetovanyń esimi qashalyp jazylǵan. Óitkeni olardyń bári 1958 jyly Qazaqstan ádebieti men óneriniń Máskeýdegi onkúndigine Inder aýdanynan qatysqan.
Dombyra monýmenti “ARSM” JShS-niń basshysy J.Sháripovtiń demeýshiligimen ornatylǵan. Kásipker igilikti iske 6 mln teńge bólgen.
