Atyraý oblysynda apatty jaǵdaida turǵan 190-nan astam turǵyn úi bar. Sonyń shamamen 90-y Atyraý qalasynyń aýmaǵynda ornalasqan. Ǵasyrǵa jýyq ýaqyt buryn salynǵan bul úilerdiń turǵyndary mundai baspanada ómir súrý adam densaýlyǵy men qaýipsizdigine qater tóndiretinin aityp, dabyl qaǵyp jatyr, dep habarlaidy Dalanews.kz Inform.kz-ke silteme jasap.
Qulaǵan qabyrǵalar men opyrylǵan shatyrlar ásirese Shúkir Erkinov kóshesindegi úilerden anyq baiqalady. №4 jáne №4a turǵyn úiler shamamen 70 jyl buryn salynǵan. Atalǵan úilerdiń apatty dep tanylǵanyna qaramastan, turǵyndardy kóshirý máselesi áli kúnge deiin sheshimin tappaǵan.
Turǵyndardyń aitýynsha, buǵan deiin qala ákimdigi olardy Ogorodnyi shaǵynaýdanyndaǵy kópqabatty úige kóshirýge ýáde bergen. Bul ýádeni sol kezdegi qala ákimi Shákir Keikin aitqan. Alaida biyl jaǵdai kúrt ózgergen.
"Biz turyp jatqan úi qazir eshbir mekemeniń balansynda joq. Turǵyn úi kooperativi de qurylmaǵan", - deidi osy úidiń turǵyny Fariza Sársenǵalieva.
Turǵyndar jyl saiyn óz qarajatyna jóndeý jumystaryn júrgizip, páterlerdi kútip ustaýǵa tyrysatynyn aitady. Alaida úilerdiń qabyrǵasyn zeń basyp, ómir súrý barǵan saiyn qiyndap barady.
"Eger úi jyly ári taza bolsa, eski ekenine qaramastan tura berer edik. Biraq jylý múlde jetpeidi. Páter ishinde syrt kiimmen júrýge májbúrmiz. Keibir kórshiler basqa jaqtan úi jaldap kóship ketken. Al múmkindigi joqtar osynda qaldy. Jihazdyń bárin zeń basyp ketken. Adamdar nesie alyp jóndeý jasaidy, biraq nátije joq", - deidi turǵyn Aizada Beisembai.
Atyraý qalalyq turǵyn úi-kommýnaldyq sharýashylyq jáne turǵyn úi inspektsiiasy bóliminiń málimetinshe, Shúkir Erkinov kóshesinde ornalasqan úsh úi apatty dep tanylǵan. Bir úide 22 páter bar. Bul úiler 2011 jyly resmi túrde apatty sanatqa engizilgen.
"Oblys ákiminiń orynbasary bekitken 2029 jylǵa deiingi jol kartasy bar. Biyl eki apatty úidi buzý týraly sheshim qabyldandy. Qalǵan 89 úidi 2029 jylǵa deiin kezeń-kezeńimen kóshirý josparlanyp otyr. Apatty úilerdiń turǵyndaryna biýdjet esebinen páterler satyp alynady", - dedi qalalyq TÚKSh jáne turǵyn úi inspektsiiasy bóliminiń sektor meńgerýshisi Gúljamal Joldasova.
Bólim dereginshe, jyl saiyn orta eseppen 7–8 apatty úidiń turǵyndary kóshiriledi. Al máseleni aldaǵy úsh jylda túbegeili sheshý úshin jyl saiyn keminde 29 úidi kóshirý qajet.
Resmi málimetke sáikes, Atyraý oblysynda 2023 jyly 13 úi, 2024 jyly 24 úi, al 2025 jyly 20 apatty úidiń turǵyndary jańa baspanaǵa kóshirilgen.
