Atyraý Qulsary qalasynyń taǵdyryn qaitalap, sý astynda qalýy múmkin. Bul týraly Atyraý oblysy ákiminiń orynbasary Jasulan Bisembiev aitty, dep habarlaidy Dalanews.kz Orda portalyna siltep.
Qalany sý basý qaýpi Orynbor men Oraldan kem bolmaidy degen boljam bar.
«Árine, Atyraý daiyndalyp jatyr. 5 kúnniń ishinde jaǵalaýlardy nyǵaityp, qorǵanys bógetterin salýǵa oblystaǵy 20 iri qurylys kompaniiasy men alty iri munai kompaniiasy jumyldyryldy», - dedi Jasulan Bisembiev.
Jergilikti bilik qap, kúrek jáne inertti materialdardan turatyn qajetti quraldar qoryn da daiyndap qoiǵan.
5 sáýirde Irikla sý qoimasy Jaiyq ózenine rekordtyq kólemde sý jiberdi. Mundai kólemdegi sý qala tarihynda buryn-sońdy bolmaǵan.Jaiyq ózeniniń qaýipti ýchaskelerine 10 shaqyrymdyq bóget salyndy. Bul úshin 38 myńǵa jýyq qum salynǵan qap paidalanyldy.
Al Atyraý qalasynyń irgesindegi 12 qaýipti aýmaqta jaǵalaýdy bekitý jumystary júrgizilýde. Ol jerde 172 arnaiy tehnika jumys istep jatyr.
«Jaiyq jaǵalaýynyń erekshe osal aimaqtaryn nyǵaitý jumystary táýlik boiy júrgizilýde. Biraq bul jetkiliksiz dep esepteimiz. Orynbordan sý tasqyny týraly naqty derekter alǵan joqpyz. Biraq 1993 jyly Irikla sý qoimasynan jiberiletin sý kólemi táýligine 1100 tekshe metr bolǵan.
Qazir odan keletin sý táýligine 2000 tekshe metrden asty. Sondyqtan qala ishindegi barlyq qorǵanys bógetterin kúsheitýimiz kerek. Ár shaqyrymdy arnaiy jumys tobyna bekitemiz», – dep túiindedi Bisembiev.
